«Batys» óńirlik qolbasshylyǵynyń áskerı bólimderi óz tańdaýlaryn jasady (FOTO)

ORAL. QazAqparat - QR Ulttyq ulany «Batys» óńirlik qolbasshylyǵynyń Aqtaý, Aqtóbe, Atyraý jáne Oral qalasynda ornalasqan áskerı bólimderi búgin uıymshyldyqpen daýys berip, óz tańdaýlaryn jasady.

«Batys» óńirlik qolbasshylyǵynyń baspasóz qyzmetinen túsken málimetke qaraǵanda, barlyq bólimderde saılaý zańǵa sáıkes ótkizildi. Oralda 5517-áskerı bólimde ornalasqan №479 saılaý ýchaskesinde alǵashqylardyń biri bolyp «Batys» óńirlik qolbasshysy, general-maıor Qaırat Aqtanov daýys berdi. «Búgin - tarıhı kún. Eldiń bolashaǵy osy saılaýǵa baılanysty. Sondyqtan Qazaqstan azamaty retinde óz boryshymdy oryndap, azamattyq ustanymymdy bildirdim», dedi Q.Aqtanov. 6656-áskerı bólim komandıriniń tárbıe jáne áleýmettik-quqyqtyq jumystar jónindegi orynbasary, ýchaskelik saılaý komıssııasynyń tóraǵasy, maıor Dýlat Imanovtyń aıtýynsha, áskerı qyzmetkerler belsendilikteriniń joǵary ekendigin kórsete bildi. Týǵan kúnderi saılaýmen tuspa-tus kelgen bes jaýynger umyt qalmaı, olarǵa syılyqtar tabys etildi. Sondaı-aq alǵashqy bolyp óz tańdaýyn jasaǵandar da umyt qalǵan joq.

Saılaý komıssııalarynda zańbuzýshylyqtardyń bolmaǵandyǵyn baıqaýshylar da atap ótti.

Sonymen, saǵat 11.00-ge deıin «Batys» óńirlik qolbasshylyǵynyń jeke quramy túgeldeı daýys berdi. Áskerı bólimderdegi barlyǵy bes jabyq saılaý ýchaskesinde 5 myńnan astam adam óz tańdaýyn jasady.