Batys óńirlerdegi 46 kásiporyn jumysshylary jalaqynyń tómendigine narazy – mınıstrlik

NUR-SULTAN. QazAqparat –QR Eńbek jáne halyqty áleýmettik qorǵaý mınıstri Serik Shápkenov vedomstvonyń keńeıtilgen alqa májilisinde eńbek daýlaryn júıeli sheshý úshin qandaı sharalar qabyldanyp jatqanyn baıandady, dep habarlaıdy QazAqparat tilshisi.

Serik Shápkenovtiń aıtýynsha, eńbek janjaldaryn sheshýge kásipodaqtardyń qatysýyn kózdeıtin zań jobalaryn ázirlenbek.

«Búginde 66 kásiporyn monıtorıngpen qamtylǵan. Jumysshylardyń jalaqy mólsherine narazylyǵyna baılanysty táýekelder áli de bar. Olar negizinen Mańǵystaý (27 kásiporyn), Atyraý (12) jáne Batys Qazaqstan (7) oblystarynda baıqalady. Qazirgi ýaqytta táýekel aımaǵynda ornalasqan 46 kásiporyn boıynsha qyzmetkerler jalaqyny kóterýdi talap etýde», - dedi vedomstvo basshysy.

Aıtýynsha, 2021 jyldyń qorytyndysy boıynsha 3,1 mln adam 157 myń teńgege deıin nemese «medıanalyq» deńgeıden tómen jalaqy alǵan.

«Eńbekaqy monıtorıngisiniń nátıjesinde biz ákimdikterge 2,8 myń iri kásiporynnyń tizimin jiberdik Olarmen kásipodaqtarmen birge jalaqyny arttyrýǵa baılanysty jumys júrgizý qajet», – dedi Serik Shápkenov.

Mınıstrdiń aıtýyna qaraǵanda, búgingi tańda jalaqy boıynsha bereshek 901 mln teńge bolǵan.