«Batys Qytaı - Batys Eýropa» jobasy aıasynda Jambyl oblysynda 85 shaqyrymdyq jańa jol paıdalanýǵa beriledi
Bul týraly BAQ ókilderine arnalǵan baspasóz týry barysynda QR Kólik jáne kommýnıkatsııa mınıstrliginiń Jambyl oblystyq departamentiniń dırektory Ulan Alıpov aıtty.
Departament dırektorynyń aıtýynsha, jalpy Jambyl oblysy aýmaǵynan jobanyń 480 shaqyrymy ótedi. Qazirgi kezde bunyń 263 shaqyrymynda tender utyp alǵan tórt merdiger kompanııa jumys isteýde. Al, qalǵan 217 shaqyrym boıynsha eki merdiger kompanııa jumys isteıtin bolady. Qazirgi kezde olardyń bireýi anyqtalǵan, ekinshisimen tenderlik jumystar júrgizilýde.
Ulan Alıpovtyń aıtýynsha, 480 shaqyrymdyq joldyń 283 shaqyrymy birinshi sanatta, ıaǵnı eki jolaqta. Al, 197 shaqyrymy tórt jolaqty bolmaq. Jol boıynda jańadan 12 kópir salynbaq. Bularmen qatar, aýyl sharýashylyq tehnıkalary, mal ótetin ótkelder, aýyldyq qyzmet kórsetý oryndaryn salý júzege asyrylady. Qazirgi kezde bul aýmaqta tórt merdiger kompanııanyń 1084 tehnıkasy jumys isteýde. Jumysty 4257 adam júzege asyrýda. Onyń 27-si shet eldik, 2 326 adam jergilikti turǵyndar. Sondaı-aq, 1 904 adam basqa oblystardan. Tehnıka men adam sany boljanǵannan edáýir kóp. Soǵan baılanysty tórt ýchaskede jumystar jospardan buryn júzege asyrylýda.
Jalpy Jambyl oblysy boıynsha salynatyn joldyń jalpy bıýdjeti 171,6 mıllıard teńgeni quraıdy. Merdiger kompanııa basshylarynyń aıtýynsha, adam sany men tehnıka jetkilikti. Jumysshylar úshin vahtalyq poselkalar, shıkizat úshin shaǵyn zaýyttar salynǵan. Jumysshylar 90-100 myń teńge kóleminde jalaqy alady. Al, salynǵan jol sapasyn shet eldik jáne otandyq kompanııalar qatań baqylaıdy. Jol salynyp bitkenge deıin jol sapasyn qazirgi kezde bes satyly tekserýden ótkizý kózdelgen.
Jalpy Jambyl oblysy boıynsha ótetin jol belgilengen 2012 jyly aıaqtalatyn bolady. Merdiger kompanııalar joldy belgilengen merzim boıynsha, barlyq talapqa saı etip bitiretinderin aıtyp otyr.