Batys Qazaqstannyń elektr jelileri birtutas júıege biriktiriledi

ASTANA. QazAqparat – 2029 jylǵa qaraı qazaqstandyqtardyń gaz tutyný kórsetkishi 65%-ǵa jetý kerek. Energetıka mınıstri Bolat Aqsholaqov Úkimet otyrysynda vedomstvo aldyna osyndaı mindet qoıylǵanyn aıtty, dep habarlaıdy QazAqparat tilshisi.

«Memleket basshysy qoıǵan mańyzdy máselelerdiń biri – halyqty gazben qamtamasyz etý. Mınıstrlik halyqty gazdandyrý deńgeıin 2029 jylǵa qaraı 65%-ǵa deıin jetkizýdi josparlap otyr. Bul 12 mln adamdy tabıǵı gazben qamtamasyz etedi.

Energetıkalyq qaýipsizdik máselelerin kúsheıtý úshin 2029 jylǵa qaraı 3,7 GVt energııa generatsııalaıtyn qýat iske qosylady. Onyń ishinde 1,8 GVt elektr stantsııalaryn jańǵyrtý jáne 1,9 GVt jańa bý-gaz qondyrǵylaryn salý jospary bar», - dedi vedomstvo basshysy.

Sondaı-aq, ol 2026 jylǵa qaraı jańartylatyn energııa kózderiniń 50-den astam nysany iske qosylatynyn atap ótti.

«Osylaısha jańartylatyn energııa óndirisiniń kólemi 1,5 ese ósedi jáne el boıynsha elektr energııasynyń jalpy óndirisinde 7%-ǵa jetedi.

2029 jylǵa deıin Ulttyq elektr jelisin jańǵyrtý, onyń ishinde Batys Qazaqstannyń elektr jelilerin Birtutas elektr energetıkalyq júıege qosý boıynsha jumystar júrgiziledi», - dedi Bolat Aqsholaqov.