Batys Qazaqstanǵa Sinopharm kompanııasynyń vaktsınasy jetkizildi

ORAL. QazAqparat - Batys Qazaqstan oblysyna keshe Sinopharm kompanııasynyń Vero Cell vaktsınasynyń 10 myń dozasy jetkizildi, dep habarlaıdy QazAqparat tilshisi.

Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, vaktsına 18 jastan asqan eresek adamdarǵa arnalǵan.

Vaktsına emhanalarǵa bólinip berildi.

Kúni búginge deıin oblysta 184 390 adam koronavırýs vaktsınasynyń birinshi, 141 782-si ekinshi komponentimen egildi.

Sonyń ishinde 9 426-sy - medıtsına qyzmetkerleri, 15 631-i - pedagogtar (99,5 paıyz), 4 392-si - quqyq qorǵaý organdarynyń ókilderi (88,8 paıyz), 1 287-si - medıtsınalyq-áleýmettik jáne jabyq balalar mekemelerinde jumys isteıtinder.

Óńirde turǵyndardy vaktsınatsııalaý odan ári jalǵasýda.

Eske sala keteıik, budan buryn BQO-da koronavırýs juqtyrǵan 2 415 naýqastyń ambýlatorııada emdelip júrgenin jazǵan bolatynbyz.