Batys Qazaqstanǵa bir jylda 45 oralman otbasy kóship keldi
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Qalııar Aıtmuhambetovtiń aıtýynsha, osylaısha, óńirge qonys aýdarǵan 68 qazaqqa oralman mártebesi berildi.
QR Úkimetiniń qaýlysyna sáıkes oralmandar men qonys aýdarýshylardy qabyldaýdyń óńirlik kvotasy bekitilip, oǵan Aqmola, Qostanaı, Pavlodar, Shyǵys Qazaqstan, Soltústik Qazaqstan oblystary engizilgen. BQO bul óńirlik kvotaǵa ilikpegenmen, Aq Jaıyqqa oralmandardyń kelý legi toqtamaıdy, aldaǵy ýaqytta da jalǵasa beredi.
Batys Qazaqstan oblysy atajurtqa oralǵan otbasylardy 1993 jyldan qabyldaı bastady. Shırek ǵasyrǵa jýyq ýaqyt ishinde oblysqa 3944 oralman otbasy nemese 17706 adam kóship keldi. Sonyń basym bóligi Ózbekstan (2461 otbasy, 13735 adam) men Reseı Federatsııasynan (1283 otbasy, 3484 adam).
Qazirgi tańda atamekenge kelgen otandastarymyz urpaq órbitip, el qatarly ómir súrýde. Olardyń arasynda óz kásibin óristetip otyrǵandary da az emes.