Batys Qazaqstandaǵy shekara beketindegi ahýal túbegeıli ózgerdi

ORAL. QazAqparat – BQO-nyń Samara oblysymen shektesetin «Syrym» shekara beketindegi ahýal túbegeıli ózgerdi, dep habarlaıdy QazAqparat tilshisi.

«Moı gorod» portalynan alynǵan aqparatqa qaraǵanda, budan eki kún buryn atalmysh shekara beketindegi júk kólikteriniń keptelisi jeti shaqyrymǵa sozylsa, qazir anaǵurlym qysqarǵan, shamamen eki shaqyrymdaı.

Reseı jaǵyndaǵy «Mashtakov» shekara beketinde Qazaqstan tarapyna ótemin deýshilerge azyq-túlik pen benzın úsh ese qymbatqa satylatyn. 2 qazan kúni jaǵdaı múldem ózgergen. Alaıda joldyń sheti turmystyq qaldyqtarǵa tolyp qalǵan. Jel bos paket, qaǵazdardy ushyryp áketýde.

Sonymen qatar shekara beketinde taksıster de azaıǵan. Adamdar kóp bolǵan alǵashqy kúnderi shekara beketinen Oral qalasyna deıin taksıster jolaýshylardy 2 myń rýblge (16 myńnan astam teńge) aparsa, baǵa qazir eki esege tómendegen.

Batys Qazaqstan oblysyna Reseıden 29 qyrkúıek kúni kelgen reseıliktiń aıtýynsha, ol joldasyn kútip tur eken. 2 qazan kúni Reseı tarapynan tek júk kólikteri men ózbekstandyq azamattardyń otyz avtokóligi baıqalady.

«28 qyrkúıek kúni kóptegen adam áskerge shaqyrý qaǵazyn aldy, sondyqtan olar eshqaıda shyǵa almaıdy. Al ishinara mobılızatsııaǵa ilikpegender shekarany kedergisiz ótip jatyr», dedi er adam.

Qazaqstan tarapynan jeńil kólikter boıynsha kezek joq.

Eske sala keteıik, budan buryn BQO ákimi shekarada qalyptasqan jaǵdaıǵa baılanysty jıyn ótkizgenin jazǵan bolatynbyz .