Batys Qazaqstanda jedel ishek ınfektsııasy 14 ese ósip ketken

ORAL. QazAqparat – Batys Qazaqstan oblysynda jedel ishek ınfektsııasy 14 ese ósip ketip otyr, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaev óńirlik kommýnıkatsııalar qyzmetindegi brıfıngte málim etkendeı, jyl basynan beri 140 adam jedel ishek juqpasyna (ótken jyly osy merzimde – 10) shaldyqqan.

Onyń sózine qaraǵanda, ishek aýrýlarynyń kóbeıýi úıde daıyndalǵan taǵamdardy talapqa saı saqtamaý, durys termııalyq óńdemeý jáne 14 jasqa deıingi balalardyń jeke gıgıena erejelerin buzýyna baılanysty.

Sondaı-aq bıyl pedıkýlez 7,3 ese (2022 jyly – 6, 2023 jyly – 44) artqan.

Pedıkýlezben 14 jasqa deıingi balalar jıi aýyrady, bul ata-analardyń olardy durys baqylamaýynan, gıgıenalyq talaptardyń saqtalmaýynan týyndaıdy.

Departament basshysynyń aıtýynsha, sozylmaly vırýstyq gepatıt 3,1 esege (16-dan 50-ge), opıstorhoz 3,6 ese (8-den 29-ǵa), jiti respıratorlyq vırýstyq ınfektsııalar 2,9 ese (17324-ten 50753-ke), skarlatına 2,2 ese (73-ten 166-ǵa) kóbeıgen.

Sonymen qatar 12 A vırýsty gepatıti, 2 irińdi menıngıt tirkelgen. A vırýsty gepatıtimen 4 stýdent, 3 oqýshy men jumysshy aýyrǵan.

Sol sekildi 4 jasar baladan menıngokokk juqpasy tabyldy. Aýrý oshaǵynda menıngokokk ınfektsııasynyń taralýyn boldyrmaý maqsatynda epıdemıologııalyq tekserý ýaqtyly júrgizilip, qarym-qatynasta bolǵan 30 adam zerthanalyq tekserildi, nátıjesi teris.

«Jalpy, oblysta epıdemıologııalyq jaǵdaı turaqty. Oba, tyrysqaq, qutyrý, týlıaremııa, túıneme, búırek sındromdy gemorragııalyq qyzba (BSGQ), ish súzegi, epıdemııalyq paratıt, paratıf, polıomıelıt, dıfterııa, qyzamyq, sirespe jáne bezgek derti tirkelgen joq», dedi M.Aryspaev.

Bıyl koronavırýs 53,8 ese (9584-ten 178-ge), jelsheshek 1,3 ese (476-dan 357-ge) azaıdy.

Taǵy bir juqpaly aýrý – týberkýlezben 53 adam syrqattanǵan.

Bul, ásirese, Jánibek, Terekti, Syrym aýdandary men Oral qalasynda oblystyq orta kórsetkishten joǵary bolyp otyr.

Jańa týǵan nárestelerdiń 96,3 paıyzy (1899) týberkýlezge qarsy ekpe aldy.

M.Aryspaevtyń málimdeýinshe, álemde jáne elimizde qyzylsha boıynsha epıdemıologııalyq jaǵdaıdyń nasharlaýyna baılanysty balalardy ýaqtyly egý jumystary júrgizilýde.