Batys Qazaqstanda jasotandyqtar dárigerlerge qymyz jetkizýde

ORAL. QazAqparat – Batysqazaqstandyq jasotandyqtar «Aq halatty abzal jandar aýyrmasyn» atty shara aıasynda dárigerlerdi qymyzben qamtýda, dep habarlaıdy QazAqparat tilshisi.

«Jas Otan» jastar qanaty BQO fılıalynyń konsýltanty Erlik Shamǵalıdyń aıtýynsha, 10 shildede bastalǵan shara tamyz aıynyń sońyna deıin sozylmaqshy.

Mundaǵy maqsat – Covid-19 dertine shaldyqqan naýqastarmen tikeleı̆ qarym-qatynas jasap, indetpen kúreste aldyńǵy shepte júrgen medıtsına qyzmetkerlerine kún saıyn qymyz ben saýmal jetkizip, ımmýnıtetterin kóterip, búgingi kúnniń batyrlaryna qoldaý kórsetý.

«Nur Otan» partııasy BQO fılıaly tóraǵasynyń birinshi orynbasary Murat Muqaevtyń qoldaýymen jergilikti «Jaılaý» sharýa qojalyǵymen kelissóz jasalyp, sonyń nátıjesinde jasotandyq eriktiler bir aı boıy oblystyq, qalalyq kópbeıindi aýrýhanalar men oblystyq juqpaly aýrýlar aýrýhanasyna jalpy kólemi 1 tonna sýsyndy kún saıyn jetkizip otyrmaqshy.

Atalǵan shara óńirdiń 12 aýdanynda, sondaı-aq Aqtóbe, Mańǵystaý oblystarynda jalǵasyn tapty.

Kúni búginge deıin oblys dárigerlerine 400 lıtr qymyz usynyldy.

«Qymyzben shektelip qalmaı, 21 shildeden bastap jádel járdem qyzmetkerlerine ystyq tamaq taratýdy josparlap otyrmyz. Árıne, qymyz, shubat, bir mezgildik tamaqpen eshkimniń jyrtyǵyn jamaı qoımaspyz. Degenmen áńgime aq jeleńdi abzal jandarǵa degen shynaıy kóńil, ystyq yqylas, nıette. Olar da ózderine jan-jaqtan qoldaý bildirip jatqandardy kórip, indetpen kúreste jalǵyz emestigin sezinip, alǵysyn aıtyp jatady», dedi Erlik Shamǵalı.

«Men osy salada jeti jyldan beri eńbek etip kelemin. Koronavırýs juqpasy anyqtalǵan 29 naýryzdan beri býfette jumys jasaýdamyn. Bizge qolushyn sozǵan jandardyń bárine shyn kóńilden rızashylyǵymyzdy bildiremiz», dedi oblystyq juqpaly aýrýlar aýrýhanasynyń qyzmetkeri Záýresh Qabasheva.

Eske sala keteıik, budan buryn Batys Qazaqstanda pnevmonııamen 1600 adamnyń aýyrǵanyn jazǵan bolatynbyz.