Batys Qazaqstanda un baǵasy ósti
Oral qalasyndaǵy ortalyq bazarda qazirgi kezde 50 kelilik joǵary surypty unnyń ortasha baǵasy 6 myń teńge turady.
Satýshylardyń sózine qaraǵanda, budan bir-eki apta buryn joǵary surypty bir qap unnyń quny 5500 teńge shamasynda bolǵan. Sol sekildi birinshi surypty unnyń baǵasy 4800-den 5350 teńgege kóterildi.
«Bizge un Jelaev astyq ónimderi kombınatynan keledi. Munda satýshylar ári ketkende 150 teńgedeı kóterip satatyn bolar», - deıdi olar.
«Jelaev astyq ónimderi kombınaty» AQ menedjeri Edýard Mamyshev kúni búgin joǵary surypty unnyń ár kelisi 115 (bir qap un - 5750 teńge), birinshi surypty un 105 teńge (5250 teńge) turatynyn jetkizdi.
Qaladaǵy dúken sórelerinde nan baǵasy ázirge óse qoıǵan joq. Mysaly, bir bólke aq nan burynǵysha 100 teńgeden satylyp jatyr.
Degenmen, astyq baǵasynyń qymbattaǵanyn oblys ortalyǵynan shalǵaıda ornalasqan Bókeı ordasy aýdanynyń jurtshylyǵy da sezinýde. Aýdan ortalyǵy Saıqyn aýylynda nan buryn 110 teńge bolsa, keı dúkenderde 130-150 teńgege bir-aq shyqty. «Nur» dúkeninde ǵana bólke - 100, qara bıdaı nany - 80 teńgeden. Aýdan ortalyǵynda eki naýbaıhana bar. Sonyń biriniń qojaıyny Gúlnár Álmuratovanyń sózine qaraǵanda, olar astyq baǵasynyń ósýine baılanysty nan baǵasyn kótergen. Biraq tabysty eseleý emes, nápaqasyn aıyrý úshin lajsyzdan qymbattatqan. Oral qalasyndaǵy elevatorlardan keletin elý kelilik bir qap un munda 5900 teńgeden 6400-ge jetken.
«Biz tek birinshi surypty un baǵasyn baqylap otyramyz, al basqa suryptar naryq baǵasy boıynsha satylady. Búginde 1-surypty unnyń 50 kelilik qapshyǵynyń baǵasy óndirýshilerde kelisine 90-100 teńge aralyǵynda bolyp, ózgerissiz qaldy. 30 qańtardaǵy jaǵdaı boıynsha oblystyń iri un tartatyn kásiporyndarynda 50,4 myń tonna azyq-túliktik bıdaı bar. Óńirde azyq-túlik qaýipsizdigin qamtamasyz etý baǵytynda jańa ónim alynǵanǵa deıin iri un tartatyn kásiporyndar 34 myń tonna astyq satyp aldy. Oǵan qosymsha taǵy da 33 myń tonna astyq satyp alý josparlanýda», - dep habarlady osy másele boıynsha QazAqparat tilshisine BQO aýyl sharýashylyǵy basqarmasynan.