Batys Qazaqstanda turǵyn úılermen qosa 8 jańa mektep salynýda
Óńir basshysynyń aıtýynsha, bıyl qos baǵdarlama aıasynda qurylys jumystaryna 20,9 mlrd. teńge qarastyrylyp, 9 qurylys kompanııasy jumys jasaýda. 450-den astam adam jumysqa ornalastyrylsa, qurylys materıaldarynyń 60 paıyzdan astamy jergilikti jerden alynýda.
Qurylysy júrip jatqan 15 turǵyn úıdiń (2041 páter) 11-i bıyl paıdalanýǵa berilmekshi, qalǵany kelesi jyly aıaqtalady. «Turǵyn úı qurylys jınaq banki» salymshylaryna, kezekte turǵandarǵa jáne apatty úıler turǵyndaryna arnalǵan úılerdi salyp jatqan merdiger uıymdar basshylary jumystyń kestege sáıkes júrgizilip jatqanyn jetkizdi. Oblys basshysy barlyq qurylys jumystaryn sapaly atqarýdy, sonyń ishinde aýlalardy abattandyrý, trotýar, parkıng, kireberis joldardy retteýdi ýaqtyly jasaýdy tapsyrdy. Qurylys materıaldary men jıhaz shyǵaratyn kásiporyndar ókilderimen de kezdesý boldy.
«Bıyl oblysta kópqabatty turǵyn úılermen birge 3 myńnan astam oqýshyǵa eseptelgen 8 mektep qurylysy júrgizilýde. Bul nysandardyń óńir úshin mańyzy zor. Birinshiden, qurylyspen aınalysatyn kásiporyndar óndiris kólemimen qamtamasyz etilse, ekinshiden, qurylys materıaldary men korpýstyq jáne jumsaq jıhaz shyǵaratyndar óz ónimderin ótkizýge múmkindik aldy. Elbasy tapsyrmasyna sáıkes memlekettik baǵdarlamalar aıasynda kóptegen jumystar atqarylýda. Mysaly, bilim salasynda apattyq jaǵdaıdaǵy jáne úsh aýysymda oqıtyn mektepter máselesi sheshilýde. Infraqurylym damyp, qatqyl tabandy joldar salynýda. Bir ǵana Derkól aýylynda 27 kóshe tolyqtaı asfalttalady. Sońǵy kezde Zachagan kentinde kóp qabatty úıler sany artyp keledi. Sondaı-aq oblystyń segiz aýdanynda 240 páterge teń úıler salynýda. Aýdandarda 3 myńnan astam jer telimi «Nurly jer» baǵdarlamasy aıasynda jeke úı salý úshin kezekte turǵandarǵa beriledi. Jumys kólemi aýqymdy, osynyń bárin sapaly da merziminde atqara bilý kerek», dedi ákim.