Batys Qazaqstanda Táýelsizdik meıramyna oraı 95 nysan ashyldy
Aldymen apatty jaǵdaıdaǵy ǵımarattyń ornyna salynǵan №4 orta mektep paıdalanýǵa berildi. 300 oryndyq mektep qurylysyna 950,6 mln teńge bólindi.
Onyń ashylý rásimine qatysqan oblys ákimi Altaı Kólginovtiń atap ótkenindeı, «Nurly jol» baǵdarlamasy aıasynda aýdan-aýyldardy aıtpaǵanda, Oral qalasynyń ózinde tórt birdeı mektep salynýda. Ýaqytsha basqa mektepte oqyp kelgen №4 mektep shákirtteri aldaǵy qańtar aıynan jańa ǵımaratta bilim almaqshy.
Ákimniń aıtýynsha, sonymen qatar jańa mektepke aparatyn jolǵa asfalt ta tóseletin bolady. Bolashaqta qaladaǵy barlyq mektepke aparatyn joldar osylaı jańartylady.
Búgin oblys ortalyǵynda «Rýhanı jańǵyrý» mýzeıi óz esigin aıqara ashty. Oblys basshysynyń málim etkenindeı, 1893 jyly salynǵan tarıǵı ǵımaratty kásipker Muratbek Muhambedıev óz qarajatyna qalpyna keltirip berdi. Qazaqstannyń kıeli oryndarynyń qataryna Batys Qazaqstan oblysynan alty nysannyń engizilgeni belgili. Mysaly, Bókeı ordasy tarıhı-mýzeılik kesheni Oraldan alty júz shaqyrymdaı qashyqtyqta ornalasqan. Endi «Rýhanı jańǵyrý» mýzeıine kelgender atalmysh keshenniń kórinisin de tamashalaı alady.
Oral qalasynda iske qosylǵan nysannyń biri - 9 qabatty, 180 páterlik turǵyn úı.
Altaı Kólginovtiń sózine qaraǵanda, bıyl «Nurly jer» baǵdarlamasy aıasynda Oral men Aqsaıda 14 kóp qabatty jáne segiz aýdanda 188 úı salynýda. Barlyǵy 1700 páter bolsa, sonyń 1 500-i paıdalanýǵa berildi.
Oblys basshysy jınalǵandardy Táýelsizdik kúnimen quttyqtap, qonys ıelerine jańa páter kiltterin tabys etti.
Aıta keteıik, Táýelsizdik kúnine oraı óńirde barlyǵy 95 nysan ashyldy. Sonyń ishinde 337 otbasy baspanaly bolsa, segiz birdeı áleýmettik nysan iske qosyldy.