Batys Qazaqstanda Táýelsizdik kúnine oraı birneshe nysan ashyldy
Zelenov aýdany ortalyǵynda «Meniń elim» monýmenti boı kóterdi. Onyń ashylý rásimine qatysqan oblys ákimi Altaı Kólginov bul monýmenttiń Elbasynyń «Rýhanı jańǵyrý» baǵdarlamasy aıasynda kásipkerlerdiń qoldaýymen turǵyzylǵanyn jetkizdi. Oǵan memleketten qarjy jumsalǵan joq. Bul batysqazaqstandyqtardyń rýhanı jańǵyrý baǵytynda birlesip is tyndyryp jatqandyǵyn taǵy bir dáleldeıdi.
Joba quny - 18 mln teńge. Monýmenttiń bıiktigi 14 metr bolsa, eni - 1,3 metr. Monýment avtory - Qazaqstan Sýretshiler odaǵynyń múshesi Erǵalı Bekeshev.
Sonymen qatar osy aýdan ortalyǵynda jańadan salynǵan dene shynyqtyrý-saýyqtyrý kesheni paıdalanýǵa berildi. Jalpy alańy 1247,2 sharshy metr ǵımarat qurylysyna oblys bıýdjetinen 281,2 mln astam teńge bólindi.
«Qazaqstan táýelsizdik alǵannan bergi jıyrma alty jyl ishinde Elbasymyzdyń bastaýymen kóptegen tabystarǵa qol jetkizip keledi. Sonyń aıǵaǵyndaı Táýelsizdik merekesine oraı óńirimizde de jańa nysandar ashylýda. Memleket basshysynyń buqaralyq sportty damytý jónindegi tapsyrmasyna sáıkes oblysta bıyl tórt birdeı sport nysany salynyp jatsa, sonyń biri - osy keshen. Endi munda turǵyndar sportpen turaqty aınalysyp, densaýlyqtaryn shyńdap, tyń tabystarǵa qol jetkize alady. Qasıetti mereke qarsańyndaǵy osynaý bizdiń qýanyshymyzǵa bokstan qos birdeı olımpıada chempıony Ermahan Ibraımov pen Danııar Eleýsinov ortaqtasyp otyr», dedi Altaı Kólginov.