Batys Qazaqstanda taǵy da suıytylǵan gaz jetispeı jatyr
BQO energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáıdiń málim etkenindeı, bul Atyraý munaı óńdeý zaýytyndaǵy aqaýlaryna baılanysty jumysty 1 aqpannan bastap toqtatqanyna baılanysty bolyp otyr.
«Bizge túsken aqparatqa qaraǵanda, jóndeý jumysy keminde eki aptaǵa sozylady delingenimen, odan uzap ketýi múmkin. Sonyń saldarynan óńirde 100-den astam avtogaz quıý stansalarynda suıytylǵan gaz tapshylyǵy qalyptasyp otyr. Oblys sonymen qatar «SNPS-Aqtóbemunaıgaz» AQ-dan suıytylǵan gaz alady. Máseleni sheshý úshin «Jaıyqmunaı» JShS-men 1300 tonnaǵa deıin suıytylǵan gaz alýǵa kelisim jasaldy. «Alaý», «Táýekel» JShS sekildi jergilikti gaz tasymaldaýshylar «Jaıyqmunaıdan» kesheden bastap ala bastady. Osy baǵytta «SNPS-Aqtóbemunaıgaz» AQ-men de kelissóz júrgizilip jatyr. Jalpy, Atyraý munaı óńdeý zaýyty BQO ǵana emes, Qazaqstannyń batys jáne ońtústik óńirlerine suıytylǵan gaz jóneltedi. Sondyqtan ol aımaqtarda da tapshylyq baıqalýy múmkin», - dedi QazAqparat tilshisine M.Múlkáı.
Atalǵan basqarma basshysynyń orynbasary Qanat Ómirálıevtiń óńirlik kommýnıkatsııalar qyzmeti alańynda ótken brıfıngide naqtylaǵanyndaı, oblystaǵy suıytylǵan gazdyń qory 550 tonnany quraıdy. Aı saıynǵy qajettilik 5,5 myń tonna bolsa, qordaǵy gaz úsh kúnge jetedi.
Onyń sózine qaraǵanda, Atyraý munaı óńdeý zaýyty búgin kún saıyn BQO-ǵa táýligine 50 tonnaǵa deıin suıytylǵan gaz jetkizýdi qaıta bastaǵan.
Oral qalasynda Jáńgir han kóshesi men Oral-Saratov kúre jolynyń qıylysynda ornalasqan «Sekvoııa Invest» JShS-nyń avtogaz quıý stansasynda suıytylǵan gaz tek talonmen bosatylýda. Stansadaǵy atalmysh JShS ókili bul máseleniń qashan sheshiletinin aıta almady.
«Únemi osy stansadan suıytylǵan gazdy quıdyratyn edim. Talonym joq, endi ne isterimdi bilmeı turmyn. Qalada azyn-shoǵyn jerlerde ǵana bar dep jatyr. Gaz máselesi osy aıdyń ortasynda sheshiledi dep aıtýda», dedi aty-jónin atamaýdy ótingen júrgizýshi.
Eske sala keteıik, budan buryn BQO-da suıytylǵan gazdyń jetispeýshiligi baıqalyp otyrǵanyn jazǵan bolatynbyz.