Batys Qazaqstanda «Sulý sózdiń sardarlary» marapattaldy

ORAL. QazAqparat - Búgin Aqjaıyq aýdany ortalyǵy Chapaev aýylynda aqyn Saǵynǵalı Seıitovtiń 100 jyldyǵyna arnalǵan «Saǵynǵalıdiń syrly álemi» atty saltanatty shara barysynda «Sulý sózdiń sardary» atty aımaqtyq baıqaýdyń qorytyndysy jarııa etilip, jeńimpaz-júldegerler marapattaldy, dep habarlaıdy «QazAqparat» tilshisi.

Baıqaýǵa barlyǵy 200-den astam jumys túsip, ony arnaıy qurylǵan qazylar alqasy saralap, baǵalady.

«Óleń bop aqyn órilse...» atty Saǵynǵalı Seıitovke arnalyp jazylǵan óleńder atalymy boıynsha bas júldeni oraldyq jas talant, qazirgi kezde Almatyda oqyp jatqan Márlen Ǵılymhan jeńip aldy. Aqjaıyq aýdandyq «Jaıyq tańy» gazetiniń tilshisi Bekbolat Qalenov - birinshi, aqjaıyqtyq aqyn Saǵyntaı Bısenǵalıev pen Terekti aýdandyq «Terekti jańalyǵy» gazetiniń tilshisi Ádilet Orynbasarov - ekinshi, atyraýlyq Rahymjan Orynbasarov pen Jánibek aýdanynan Oralbek Ysqaq úshinshi orynǵa ıe boldy.

Aqyn óleńderin «Aq-jaýyn jyry tógilse...» atty mánerlep oqý atalymy boıynsha bas júlde Oral qalasyndaǵy №30 mekteptiń oqýshysy Azamat Nurlybekke buıyrdy. Atyraý oblysy Qurmanǵazy aýdanynan Eldos Qulsharov - birinshi, jánibektik Aqnur Azamatova men jańaqalalyq Manas Bolatov - ekinshi, oraldyq Marhabat Serikov pen Aqjaıyq aýdany Abaı atyndaǵy mektep-gımnazııa shákirti Aıarý Ádil úshinshi orynǵa kóterildi.

S.Seıitovtiń ómiri men shyǵarmashylyǵynan «Talanty taý bop kórinse...» atty kitaphanalar arasyndaǵy ádistemelik quraldar shyǵarý atalymy boıynsha BQO zaǵıp jáne kózi nashar kóretin azamattarǵa arnalǵan kitaphanasynyń ádiskeri Lázzat Abdolova bas júldeni enshiledi. Sondaı-aq Qaztalov aýdandyq ortalyqtandyrylǵan kitaphanalar júıesi balalar kitaphanasynyń qyzmetkeri Botakóz Aıtmaǵambetova, Saqtaǵan Báıishov atyndaǵy Aqtóbe oblystyq ǵylymı-ámbebap kitaphanasynyń bólim meńgerýshisi Gýlıa Seıitova, Atyraý oblysy, Jylyoı aýdany Qulsary qalalyq kitaphana dırektorynyń orynbasary Balzııa Kenjebekova tıisinshe birinshi, ekinshi jáne úshinshi oryndardy bólisti.