Batys Qazaqstanda stýdent menıngıtke shaldyqty

ORAL. QazAqparat - Batys Qazaqstan oblysynda stýdent menıngıtpen aýyrdy, dep habarlaıdy QazAqparat tilshisi.

BQO qoǵamdyq densaýlyq saqtaý departamentinen túsken málimetke qaraǵanda, bul - bıylǵy birinshi jaǵdaı. 17 mamyr kúni Zelenov aýdany Mahambet aýylynyń turǵyny, Oral qalasyndaǵy joǵary oqý orny stýdentiniń menıngokokk juqpasyna shaldyqqany anyqtaldy.

2015 jyly osyndaı 13 jaǵdaı tirkelip, onyń ekeýi ólimge aparyp soqtyrǵan bolatyn. Ótken jyly bul aýrý tirkelgen joq.

Aıta keteıik, menıngokokk ınfektsııasy - nazofarıngıt (muryn men jutqynshaqtyń qabynýy), menıngıt (mı qabyqtarynyń qabynýy) jáne menıngokokk sepsısi (qannyń zararlanýy) sekildi túrli klınıkalyq belgileri bar, bakterııalar qozdyratyn jiti juqpaly aýrý.

Belgileri: menıngıt tez bastalady, kúrt bas aýyryp, adam qusady, 6-15 saǵattan keıin bórtpe paıda bolady. Dene qyzýy 39-40 °S-qa kóterilip, naýqas qaltyraıdy. Teri bozaryp, adam álsizdenip, arqa men aıaq-qolynda aýrý seziledi. Naýqas shóldep, tábeti tómendeıdi. Aýrý tumaý, baspa, ádettegi salqyn tııý aýrýlary sekildi jeńil túrde ótýi múmkin. Adamnyń qorǵanysh kúshteri álsiregende, menıngokokk mıǵa ótip, qabyný bastalady.

Infektsııa kózi - aýrý adam jáne klınıkalyq belgileri bolmaǵanmen, menıngokokk tasymaldaýshylar da kezdesedi. Aýrýdyń alǵashqy belgileri baıqalǵan boıda birden dárigerge kóriný qajet.