Batys Qazaqstanda sońǵy aıda 97 oqýshy men 19 muǵalimnen koronavırýs anyqtaldy
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, 1 qarashadan beri barlyǵy 771 naýqas tirkeldi.
Sonyń 423-i (55 paıyzy) JRVI belgileri boıynsha tekserilse, 201-i (26 paıyzy) profılaktıkalyq maqsatta qaralǵan. 132-si (17 paıyzy) buryn aýyrǵandarmen baılanysta bolsa, 15-inen (2 paıyzy) statsıonarǵa jatqyzar aldynda synama alynǵan.
Osy aıdyń alǵashqy kúnderi 32 adamnan indet tabyldy.
Sońǵy aptada (26 qarasha – 2 jeltoqsan) aldyńǵymen (19-25 qarasha) salystyrǵanda, aýrý juqtyrý kórsetkishi 15 paıyzǵa (140-tan 119-ǵa) tómendedi.
M.Aryspaevtyń aıtýynsha, oblys boıynsha 381 mektepte 114 674 oqýshy bilim alýda. Solardyń arasynan 1 qarashadan beri aýyrǵan 97 shákirttiń bári de koronavırýsty úı oshaǵynda juqtyrǵan.
Kaztalov aýdanynda K.Meńdálıev atyndaǵy orta mekteptiń 6 jáne 10-synyptary, Oralda №9 mekteptiń 9-synyby karantınge jabyldy.
Bilim ordalalarynda 16 052 muǵalim jumys jasasa, solardyń 13 420-sy vaktsına alǵan. 1 qarashadan beri syrqattanǵan 19 pedagog otbasynda buryn aýyrǵandarmen baılanysta bolǵan.
Sondaı-aq osy merzimde orta kásiptik bilim berý kolledjderinde 12, JOO-da 14 stýdentten koronavırýs tabyldy.
Osy kezge deıin 6136 stýdent vaktsınanyń birinshi, 5982-si ekinshi komponentimen egildi.
«1 jeltoqsannan beri 6 oqýshydan, oǵan qosa arnaýly orta oqý oryndarynda bilim alatyn 1 stýdentten indet tabyldy.
Muǵalimder men oqýshylar, stýdentter men qyzmetkerler arasynda kún saıyn monıtorıng júrgizilýde. 1 qarashadan beri 72 adamnyń úı karantınin buzǵany belgili boldy.
Sonyń 61-i – «qyzyl», 11-i – «sary» mártebesi bar adamdar.
Olarǵa qatysty 1 mln astam teńgege 24 ákimshilik hattama toltyryldy», dedi M.Aryspaev.
Eske sala keteıik, budan buryn Batys Qazaqstanda 2 myńnan astam adamnyń Pfizer vaktsınasyn qabyldaǵanyn jazǵan bolatynbyz.