Batys Qazaqstanda saýda oryndarynda qanttyń jetkilikti qory bar
BQO kásipkerlik jáne ındýstrıaldy-ınnovatsııalyq damý basqarmasy málim etkenindeı, 12-13 naýryz kúnderi negizgi bazarlar men saýda oryndaryndaǵy jaǵdaıǵa monıtorıng jasaý jáne azyq-túlik ónimderin kóterme ótkizýshilermen kelissóz jasaý barysynda ózge elder azamattary tarapynan taýar satyp alýǵa dúrligý baıqalǵan joq.
Sonymen qatar áleýmettik jelilerde Reseıden eksportqa tyıym salýǵa baılanysty qanttyń tapshylyǵy bolýy múmkin degen aqparat tarap ketti. Sonyń saldarynan Oral qalasyndaǵy jekelegen sýpermarketterde jergilikti turǵyndar arasynda qantty satyp alý 4 esege artty.
Sońǵy kúnderi qant baǵasynyń ósýi Reseıden Eýrazııalyq ekonomıkalyq odaq elderine astyq pen qantty eksporttaýǵa ýaqytsha tyıym salynýyna oraı atalmysh ónimdi jetkizýshilerdiń kóterme baǵasynyń kóterilýine baılanysty.
Oblys ákimdigi qant baǵasyn turaqtandyrý maqsatynda qajetti sharalardy qabyldaýda. Másele jergilikti atqarýshy organdardyń baqylaýynda.
BQO statıstıka departamentiniń málimetine qaraǵanda, sońǵy aptada qanttyń ortasha bólshek saýda baǵasy 1,7 paıyzǵa artqan. Munyń negizgi sebebi dollar baǵamynyń ózgerýine baılanysty.
Sondaı-aq qanttyń negizgi kólemi oblysqa Reseı men Belarýstan jetkiziledi. Reseıge salynǵan sanktsııa saldarynan atalǵan elderdegi birqatar iri zaýyttar kóterme saýdaǵa daıyn ónim shyǵarýdy jáne eksporttaýdy ýaqytsha doǵarǵan.
Qazirgi kezde Úkimet daǵdarysqa qarsy, sonyń ishinde óńirlerdiń ımportqa táýeldiligin tómendetý baǵytyndaǵy sharalardy qabyldaýda. Jergilikti jerde de tapshylyqqa jol bermeý jáne otandyq taýar óndirýshilermen qarym- qatynasty retteý maqsatynda jumystar júrgizilýde.