Batys Qazaqstanda revaktsınatsııadan ótken adam sany 61 myńnan asty

ORAL. QazAqparat – Batys Qazaqstan oblysynda 61 256 adam revaktsınatsııadan ótti, dep habarlaıdy QazAqparat tilshisi.

BQO densaýlyq saqtaý basqarmasynyń basshysy Arman Qalıbekovtiń aıtýynsha, osy kezge deıin 271 720 adam koronavırýsqa qarsy vaktsınanyń birinshi komponentin saldyrdy, bul – jalpy jospardyń 65,6 paıyzy.

Sonyń ishinde basym kópshiligi, ıaǵnı 191 196-sy «Spýtnık V» ekpesin, sondaı-aq 21 238-i «QazVac», 25 033-i «Hayat-Vax», 7 753-i «Corona-Vac», 26500-i «Vero Cell» vaktsınasyn qabyldady.

Sondaı-aq 258 781 adam ekinshi komponentti de aldy.

Onyń sózine qaraǵanda, Pfizer kompanııasynyń «Komırnatı» vaktsınasymen 10 329 adam egilse, sonyń 5 376-sy – jasóspirimder, 376-sy – júkti jáne 4 575-i – bala emizetin áıelder.

«Sońǵy kezde vaktsınatsııalaý tártibine ózgeris engizildi. Atap aıtqanda, QR Bas memlekettik sanıtar dárigeriniń 18 aqpandaǵy jańa №11 qaýlysyna sáıkes «Pfizer» vaktsınasymen 50 jastan asqan adamdardy revaktsınatsııalaýǵa, І, ІІ, ІІІ top múgedekterin vaktsınatsııalaýǵa jáne revaktsınatsııalaýǵa ruqsat berildi. Sol sekildi vaktsınanyń birinshi ekpesin Qazaqstannan tys jerde (shetelde) alǵan adamdar ekinshi komponentti ektire alady», dedi A.Qalıbekov.

Eske sala keteıik, budan buryn BQO-da ambýlatorlyq em alyp jatqan naýqastar sany 68,4 paıyzǵa tómendegenin jazǵan bolatynbyz.