Batys Qazaqstanda respýblıkalyq Qadyr oqýlarynyń jeńimpazdary anyqtaldy
Aqynnyń týǵan jeri Syrym aýdanynda osymen bıyl tórtinshi ret uıymdastyrylyp, onlaın túrinde ótken baıqaýǵa Nur-Sultan, Almaty, Shymkent qalalarynan, Almaty, Aqmola, Aqtóbe, Atyraý, Jambyl, Mańǵystaý, Qyzylorda, Qostanaı, Soltústik Qazaqstan jáne Batys
Qazaqstan oblystarynan barlyǵy 42 oqýshy qatysty.
«Bolý úshin jaralǵam týǵan jerdiń jyraýy...» atty Qadyr Myrza Álı sózderine jazylǵan ánderdi oryndaýdan syrymdyq Ámına Orynbasar bas júldeni jeńip aldy. Oral qalasynan Symbat Ýrmanova birinshi, mańǵystaýlyq Aısáýle Turlyǵazy men qostanaılyq Mereı Bergenov ekinshi, soltústikqazaqstandyq Kámıla Dinásh, aqtóbelik Janerke Ázimbek, qyzylordalyq Qaısar Qarabdınov úshinshi orynǵa ıe boldy.
«Sózim barda – ózim bar» atty aqyn shyǵarmalaryn jatqa oqýdan Qaratóbe aýdany Úshaǵash negizgi orta bilim beretin mektebiniń oqýshysy Nuraına Syılybek úzdik shyqty.
Syrymdyq Aıasyl Sarqul birinshi, Almaty oblysynan Іzbasar Іzmuhan men mańǵystaýlyq Farıza Jeksenbaı ekinshi, atyraýlyq Qaraqat Áljanova, aqtóbelik Gúlbaný Aldamjarova jáne elordalyq Eldos Pármeshov úshinshi dárejeli dıplommen marapattaldy. Osy bólim boıynsha qatysqan soltústikqazaqstandyq Nazarqyz Álimjanqyzy Syrym aýdany ákiminiń arnaıy syılyǵyn aldy.
«Óleń jazdym toǵyz taraý, jeti órim» atty jas daryndardyń Qadyrǵa arnalǵan óz týyndylary boıynsha oraldyq Dılnaz Dıdarqyzy aldyna jan salmady. Sondaı-
aq elordalyq Mármár Dilshát birinshi, atyraýlyq Ernur Salaýatuly men qyzylordalyq Beknur Matyǵulov ekinshi, Almaty oblysynan Aıaýlym Kúndesh pen Toǵjan Jumataı,
soltústikqazaqstandyq Gúlzat Qalymova, syrymdyq Dınara Talapova úshinshi satydan kórindi.
Respýblıkalyq saıysqa tórelik etken qazylar alqasy J.Dosmuhamedov atyndaǵy mektep-balabaqsha kesheniniń aýlasyna aǵash kóshetterin otyrǵyzdy.
«Baıqaý Qadyr óleńderin jas jetkinshekterdiń súıip oqıtyndyǵyn taǵy bir kórsetti. Sózderine jazylǵan ánder de erekshe áser qaldyrdy. Aqyn shyǵarmalaryn respýblıka
kóleminde keńinen nasıhattaýǵa Qadyr atyndaǵy qor da belsene atsalysyp keledi. Budan bylaı da osy baǵytta túrli is-sharalar uıymdastyrylatyn bolady», dedi QazAqparat
tilshisine belgili ánshi-kompozıtor, Qazaqstannyń eńbek sińirgen qaıratkeri, «Qurmet» ordeniniń ıegeri, «Qadyr Myrza Álı» qoǵamdyq qorynyń dırektory Donedil Qajymov.