Batys Qazaqstanda radıo taratý máselesi sheshiledi - Dáýren Abaev

NUR-SULTAN. QazAqparat - QR Aqparat jáne qoǵamdyq damý mınıstri Dáýren Abaev «Nur Otan» partııasynda qoǵamdyq qabyldaý ótkizdi, dep habarlaıdy QazAqparat tilshisi.

Batys Qazaqstan oblysynan beınebaılanys arqyly habarlasqan Tabyldy Masatov Jańaqala aýdanyndaǵy Qyzyloba aýylynyń máselesin kóterdi.

«Men úlken kisilerdiń atynan kelip otyrmyn. Bizdiń Qyzyloba aýylymyzda kózi múldem kórmeıtin qarııalar kóp, kózi nashar kóretin ájelerimiz bar. Solardyń suraýy boıynsha «Qazaq radıosy» máselesin kótergim keledi. Olar teledıdar kóre almaıdy, jańalyq tyńdaı almaıdy. Qazaq radıosy joq. Osyny sheship berseńiz», - dedi T.Masatov.

QR Aqparat jáne qoǵamdyq damý mınıstri Dáýren Abaevtyń aıtýynsha, ondaı másele basqa aımaqtarda da bar. Ony Keńes zamanynda da sheshe almaǵan. Búginde mınıstrlik osy másele boıynsha tıisti sharalardy bastap ketti.

«Máselen, byltyr biz Almaty men Túrkistan oblystarynda radıo taratý qurylǵysyn ornatyp, osy problemany tolyǵymen sheshtik. Endi siz aıtqannan keıin Batys Qazaqstan oblysyn da qolǵa alatyn bolamyz. Osy bir-bir jarym jyldyń ishinde atalǵan máseleni sheship beremiz dep oılaımyn», - dedi D.Abaev.