Batys Qazaqstanda paıdalanylmaı bos jatqan 503 myń gektar jer anyqtaldy

ORAL. QazAqparat – Batys Qazaqstan oblysynda paıdalanylmaı otyrǵan 503,7 myń gektar aýyl sharýashylyǵy jeri anyqtaldy, dep habarlaıdy QazAqparat tilshisi.

BQO ákimdiginen málim etkenindeı, materıaldar tekserý úshin oblystyq jer resýrstaryn basqarý departamentine joldandy.

Kúni búgin 221,6 myń gektar jer memleket menshigine qaıtaryldy. Sonyń ishinde 212,1 myń gektar jerdi paıdalanýshylar óz erikterimen bas tartty.

Al 9,5 myń gektar jer telimin májbúrlep alý jóninde mamandandyrylǵan aýdanaralyq ekonomıkalyq sotynyń sheshimi shyqty.

Sonymen qatar 103,9 myń gektar jerdi paıdalanýshylar maqsatyna saı ıgerýge kiristi.

Qalǵan 178,2 myń gektar jer boıynsha atalǵan departament tekserý júrgizip jatyr.

Bosaǵan jer telimderin sharýalarǵa berý konkýrstyq negizde júzege asady.

«Bıyl Oral qalasy boıynsha kommertsııalyq baǵyttaǵy 50 gektar jer teliminiń paıdalanylmaı otyrǵany belgili boldy. Materıaldar tekserý úshin oblystyq jer resýrstaryn basqarý departamentine berildi. Saıajaı kooperatıvteri boıynsha jalpy alańy 40 gektardan asatyn 544 ıesiz jer telimi anyqtaldy. Bulardy ıesiz nysan retinde tirkeý úshin ádilet organdaryna jiberildi. Tirkelgennen keıin bir jyl ótken soń materıaldar jerdi memlekettik menshikke qaıtarý úshin sot organdaryna beriledi», dep habarlady vedomstvodan.

Eske sala keteıik, budan buryn Batys Qazaqstanda 5 myńnan astam iri qaradan brýtsellez tabylǵanyn jazǵan bolatynbyz.