Batys Qazaqstanda Májilis pen máslıhattarǵa 673 kandıdat usynyldy

ORAL. QazAqparat – Batys Qazaqstan oblysynda partııalyq tizimderdi qosqanda, Májilis pen máslıhattarǵa 673 kandıdat usynyldy, dep habarlaıdy QazAqparat tilshisi.

BQO aýmaqtyq oblystyq saılaý komıssııasynyń tóraǵasy Ǵaısa Qapaqovtyń málim etkenindeı, sonyń ishinde bir mandattyq okrýgter boıynsha 620 adamnan ótinish tússe, qazirgi kezde olardyń zańǵa sáıkestigi anyqtalyp, tirkeý jumystary jalǵasýda.

Onyń aıtýynsha, sonyń ishinde 65-i oblystyq, 104-i qalalyq jáne 438-i aýdandyq máslıhatqa baq synap kórmek.

Oblystyq jáne qalalyq máslıhattarǵa bir orynǵa 4,3, aýdandyq máslıhatqa 3,3 adamnan kelip otyr. Joǵary básekelestik Oral qalasynda, mysaly, №8 saılaý okrýginde 7, №18 okrýgte 8 úmitker báıgege qosylmaqshy. Aýdandar boıynsha Terektide №1 okrýgte 6, Syrymda №2 okrýgte 5 adam usynyldy.

Komıssııa tóraǵasynyń sózine qaraǵanda, usynylǵan adamdardyń 516-sy nemese 76,7 paıyzy – erler, 157-si nemese 23,3 paıyzy – áıelder. Olardyń eń jasy 2001 jylǵy bolsa, eń úlkeni – 1947 jylǵy úmitker. Barlyǵy alty partııa óz kandıdattaryn usyndy.

«Oblysta majorıtarlyq júıe boıynsha №14 saılaý okrýginen Májiliske bir depýtat saılanatyny belgili. Eń kóp básekelestik osynda bolyp otyr. Munda bir orynǵa 14 kandıdat talasýǵa nıet bildirdi. Sonyń ishinde ekeýi Qazaqstanda 10 jyl turǵany týraly tirkeý qaǵazyn ákelmeýine baılanysty sáıkestikten ótken joq. Eger olar sotqa júginip, durystyǵyn dáleldese, qaıta qaraıtyn bolamyz. Ázirge bizdi sotqa shaqyrǵan joq», dedi Ǵ.Qapaqov.

Kandıdattar 18 aqpanǵa deıin salyq deklaratsııalaryn tapsyryp, Ortalyq saılaý komıssııasyna jarnalaryn tóleýi tıis.

Eske sala keteıik, budan buryn Batys Qazaqstanda 227 adamnyń Májilis pen máslıhatqa ózin-ózi usynǵanyn jazǵan bolatynbyz.