Batys Qazaqstanda maıdangerlerge 1 mln teńgeden beriledi
BQO ákiminiń baspasóz qyzmeti málim etkenindeı, 9 mamyr – Jeńis kúnine oraı jergilikti bıýdjetten tólenetin birjolǵy áleýmettik kómektiń mólsheri belgilendi.
Atap aıtqanda, Ekinshi dúnıejúzilik soǵysyna qatysýshylar men múgedekterine (40 adam) 1 mln teńgeden tólenedi.
Sondaı-aq qorshaýdaǵy Lenıngrad turǵyndaryna (3 adam), fashıstik kontslagerler men gettolardyń kámeletke tolmaǵan tutqyndaryna (9 adam) jáne keńes áskeriniń erikti jaldanýshy quramynda bolǵandarǵa (3 adam) 120 myń teńgeden beriledi.
Sol sekildi qaıtys bolǵan maıdangerlerdiń áıelderine (349), soǵys kezinde tylda eńbek etkenderge (4 543), Taýly Qarabaqta, Irakta jáne tájik-aýǵan ýchaskesinde urys qımyldaryna qatysqan áskerı qyzmetshilerge (317) 30 myń, beıbit ýaqytta qaza tapqan áskerı qyzmetshilerdiń otbasylaryna (231) 60 myń teńgeden tóleý qarastyrylǵan.
Oǵan qosa soǵys ardagerleri men olarǵa teńestirilgen adamdarǵa, fashıstik lagerler tutqyndary men qorshaýdaǵy Lenıngrad turǵyndaryna, 5 AEK (14 585 teńge) kóleminde kommýnaldyq qyzmetterdi tóleýge aı saıynǵy áleýmettik kómek kórsetiledi.
«Osylaısha bıylǵy 1 sáýirdegi málimet boıynsha Jeńistiń 76 jyldyǵyn merekeleý aıasynda barlyǵy 5 495 adamǵa jergilikti qazynadan 211,9 mln teńge birjolǵy áleýmettik járdem berilmekshi», dep habarlady BQO ákiminiń baspasóz qyzmeti.