Batys Qazaqstanda mal izdeýge shyǵyp, adasyp ketkender qutqaryldy

ORAL. QazAqparat – Batys Qazaqstan oblysynda mal izdeýge shyǵyp, adasyp ketken turǵyndar qutqaryldy, dep habarlaıdy QazAqparat tilshisi.

BQO TJ departamentiniń baspasóz qyzmeti málim etkenindeı, oqıǵa 7 qańtar kúni Syrym aýdany Araltóbe aýyldyq okrýginde boldy.

Saǵat 11.00-de 31 jastaǵy eki turǵyn «VAZ-21031» avtokóligimen jylqy izdeýge shyǵyp, adasyp ketken.

Saǵat 18.33-ten bastap TJ departamentiniń 4 qyzmetkeri eki avtokólikpen adasyp ketken turǵyndardy izdestirdi. Sonyń nátıjesinde avtokóligi synyp qalǵan eki turǵyn Araltóbe aýylynan 20 shaqyrym jerden saǵat 21.24-te tabyldy.

Araltóbe aýylyna jetkizilgen turǵyndar qutqarýshylarǵa rızashylyǵyn bildirdi.

Qutqarýshylar turǵyndardan aýa raıyna baılanysty sınoptık boljamyn muqııat qadaǵalap, eskertý jarııalanǵan kúnderi eldi mekenderden alysqa ketpeý qajettigin eske salady.