Batys Qazaqstanda mádenı-sport kesheni paıdalanýǵa berildi
Onyń ashylý rásimine qatysqan oblys ákimi Ǵalı Esqalıevtiń atap ótkenindeı, bul –memlekettik-jekeshelik áriptestik aıasynda ashylǵan nysannyń biri.
Týǵan aýylynda osyndaı zamanaýı nysandy salyp, syıǵa tartqan kásipker Beıbit Asanovtyń isi úlgi etýge turarlyq.
«Oblysta daryndy sportshylar barshylyq. Aldy Olımpıada oıyndarynda, álem, Azııa chempıonattarynda olja salyp keledi. Júldegerlerdiń kóbi aýyldan shyqqan.
Endeshe, Pogodaev aýylynan da aldaǵy ýaqytta el namysyn abyroımen qorǵaıtyn sportshylar shyǵady dep senemin», - dedi Ǵalı Esqalıev.
Batys Qazaqstanda sońǵy kezde sport salasyna da erekshe kóńil bólinip keledi. Bıyldyń ózinde Oral qalasy men oblys aýdandarynda toǵyz sport kesheni salynýda. Jańaqala aýdany Jańaqala aýylynda sport kesheni iske qosylsa, endi Terekti aýdany Podstepnyı aýyly men Bókeı ordasy aýdany Saıqyn aýylynyń turǵyndary da sondaı qýanyshqa keneletin bolady.
Óńirge tanymal kásipker Beıbit Asanov aýylynda osyndaı sport keshenin salýdy on jyldan beri armandap kelgenin, oǵan úles qosqan azamattardyń bárine rızashylyǵyn bildirdi.
Kásipker bıyl mamyr aıynda bastalǵan nysan qurylysyna 100 mln astam teńge qarajatyn jumsaǵan. Munda voleıbol, basketbol, shaǵyn fýtbol oınaýǵa bolady. Bıshilerge arnalǵan zal da bar. Keshende bir mezgilde 120 adam jattyǵa alady. Sondaı-aq 16 adamdy jumyspen qamtýǵa múmkindik týyp otyr.
Eske sala keteıik , budan buryn toǵyzqumalaqtan BQO quramasynyń komandalyq jarysta el chempıony atanǵanyn jazǵan edik.