Batys Qazaqstanda Qurban aıt merekesi keńinen toılanýda

ORAL. QazAqparat - Búgin Batys Qazaqstan oblysynyń barlyq meshitterinde aıt namazy oqylyp, mereke bastaldy, dep habarlaıdy «QazAqparat» tilshisi.

Oral qalasyndaǵy ortalyq meshitke kelgenderdi QMDB-nyń Batys Qazaqstan oblysy boıynsha ókil ımamy Rýslan qajy Sultanov quttyqtap, ıgi tilegin bildirdi.

Bıyl Qurban aıtqa baılanysty ázirlik-túsinik jumystary júrgizilip, Oral qalasynda qasapshylarǵa arnalǵan semınar, veterınarlyq-sanıtarlyq talaptarǵa saı keletin bes mal soıý pýnkti («El yrysy» bazarynyń aýmaǵy, «Kýbleı» JShS, «Ýralskıe kolbasy» JShS, «Quspanov S.K» JK, «Batys Adal et» JShS) uıymdastyryldy. Qazirgi kezde qalada toqtylar 18-20 myń teńgeden satylýda. Qoı 35 myń teńgege deıin barady. Qasapshy qoıdy soıyp, jiliktep bergeni úshin 2 myń teńge alady. Іri qaranyń baǵasy 200 myń teńgeniń tóńireginde.

Óńirde Qurban aıtqa baılanysty qaıyrymdylyq, mádenı-sporttyq sharalar da ótýde.