Batys Qazaqstanda koronavırýs juqtyrý deńgeıi 11,2 esege ósti

ORAL. QazAqparat – Batys Qazaqstan oblysynda jyl basynan beri 2725 adamnan koronavırýs anyqtaldy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, óńirde indet juqtyrý deńgeıi ótken aıdyń osy kezeńimen salystyrǵanda, 11,2 esege ósti.

Onyń aıtýynsha, aýyrǵandardyń basym kópshiligi (1725) Oral qalasynda, sondaı-aq Bórli (330), Báıterek (267), Terekti (81) aýdandarynda tirkeldi.

Syrqattanǵandardyń 139-y – 14 jasqa deıingiler, 47-si – 15- 17, 259-y – 18-25, 928-i – 26-40 jas aralyǵyndaǵylar, 414-i – alpystan asqandar.

Sondaı-aq 48,8 paıyzy (1332) – jumys isteıtin adamdar, 22,6 paıyzy (618) – jumyssyzdar, 14,5 paıyzy (396) – zeınetkerler, 3,5 paıyzy (97) – oqýshylar, 3,6 paıyzy (99) – medıtsına qyzmetkerleri, 3,1 paıyzy (85) – muǵalimder.

Sońǵy aptada (14-20 qańtar) aldyńǵymen (7-13 qańtar) salystyrǵanda, aýrý juqtyrý kórsetkishi 78,1 paıyzǵa (478-den 2188-ge) artty.

«Jyl basynan beri 97 oqýshy, 85 muǵalim, 21 stýdentten indet tabyldy. Kúni búgin karantınge jabylǵan synyptar joq. Mektepke deıingi uıymdarda 23 naýqas tirkeldi. 1 balabaqsha jáne 25 balabaqshadaǵy 38 top karantınge jabyldy», dedi M.Aryspaev.

Onyń sózine qaraǵanda, 1 qańtardan beri memlekettik shekaradan anyqtamasyz ótken 352 jolaýshynyń úsheýinen, halyqaralyq júk tasymalymen aınalysatyn 348

júrgizýshiniń bireýinen vırýs anyqtaldy. 139 adamǵa elge kirýge tyıym salyndy.

Eske sala keteıik, budan buryn BQO-da koronavırýs juqtyrǵan 224 naýqastyń statsıonarda emdelip jatyrǵanyn jazǵan bolatynbyz.