Batys Qazaqstanda kıikter jol salýshylar qazǵan transheıaǵa túsip ketti

ORAL. QazAqparat – Batys Qazaqstan oblysynda kıikter jol salýshylar qazǵan transheıaǵa túsip ketti, dep habarlaıdy QazAqparat tilshisi.

BQO orman sharýashylyǵy jáne janýarlar dúnıesi aýmaqtyq ınspektsııasynan túsken málimetke qaraǵanda, oqıǵa Jánibek aýdany aýmaǵynda boldy.

14 qyrkúıek kúni shamamen saǵat 10.00-de «WhatsApp» jelisi boıynsha ınspektsııa qyzmetkerine vıdeotúsirilim kelip túsken. Onda shamamen 12-15 bas kıiktiń (negizinen tekeleri) tereńdigi 2,5-3 metr, uzyndyǵy 700-800 metr transheıada júrgeni beınelengen.

Jánibek aýdanyna ınspektsııa qyzmetkeri shuǵyl attanyp, «Ohotzooprom» ÓB» RMQK Batys Qazaqstan aımaqtyq fılıalynyń ınspektorlarymen birlesip, oqıǵany anyqtady.

Vıdeony 11-12 qyrkúıek kúnderi Kaztalov-Jánibek avtojoly boıynda qurylys-jóndeý jumystaryn júrgizip jatqan «Temirjol jóndeý» -«SpetsStroıMontaj» JShS fılıalynyń qyzmetkerleri túsirgen.

Kıikter atalǵan joldy kesip ótken kezde qorshaýdyń joqtyǵynan transheıaǵa túsip ketip, shyǵa almaǵan. Sodan keıin arnaıy tehnıkanyń kómegimen topyraq sebilip, aq bókender bosatylǵan.

«Atalǵan aýmaq Batys Qazaqstan oblysyndaǵy kıikterdiń kóship-qonyp júretin jeri bolyp esepteledi. Sondyqtan «Temirjol jóndeý» - «SpetsStroıMontaj» JShS fılıaly basshylyǵyna aldaǵy ýaqytta mundaı jaǵdaıǵa jol bermeý qajettigi eskertildi», dep habarlady QazAqparat tilshisine BQO orman sharýashylyǵy jáne janýarlar dúnıesi aýmaqtyq ınspektsııasy. «Temirjol jóndeý - «SpetsStroıMontaj» JShS fılıalynyń qyzmetkerleri atalǵan oqıǵadan kıikterge zalal kelmegenin, arnaıy tehnıkanyń kómegimen shyǵaryp jibergenin rastady.

Eske sala keteıik, budan buryn BQO-da jappaı qyrylǵan 380-ge jýyq kıiktiń anyqtalǵanyn jazǵan bolatynbyz.