Batys Qazaqstanda qazaq-ıran-kanadalyq «QazChem» zaýyty iske qosylady
Bul zaýyt munaı-gaz kompanııalaryn qazaqstandyq joǵary sapaly hımııalyq ónimmen qamtamasyz etýdi kózdeıdi. Bul týraly kásiporyn basshylyǵy men Batys Qazaqstan oblysynyń ákimi Altaı Kólginovtiń kezdesýinde málim etildi, dep habarlaıdy «QazAqparat» tilshisi.
Investıtsııa tartý maqsatynda BQO delegatsııasy ótken jyldyń tamyzynda Iran Islam Respýblıkasynda bolyp qaıtqan edi. Odan keıin bul másele Oralda ótken «WestKazInvest-2016» forýmynda egjeı-tegjeıli talqylandy.
Óńir basshysynyń aıtýynsha, 2016 jyly Elbasy Nursultan Nazarbaev Iranǵa jumys sapary barysynda qos memleket arasyndaǵy qarym-qatynasty, sonyń ishinde kásipkerlik baılanysty damytý qajettigin atap ótken edi. Osyǵan oraı ırandyq ınvestorlarmen kelissóz júrgizilip, sonyń nátıjesinde qazaq, ıran jáne kanadalyq áriptester arasynda birlesken kásiporyn qurý jóninde zańdy qujattarǵa qol qoıylyp, nysandar qurylysy bastalyp ketti.
"QazChem" kompanııasynyń basqarýshy dırektory Alıreza Soıed Hoseınıdiń sózine qaraǵanda, zaýytta qazirgi zamanǵy jabdyqtar negizinde joǵary sapaly ónim óndirilmek. Sonymen qatar óndiristiń qorshaǵan orta úshin qaýipsiz bolýy birinshi kezekte eskeriledi. Bul óndiristi jobalaǵan kezde-aq QR zańdylyǵy talaptaryna tolyq saı kelýi qarastyrylǵan.
Jańa zaýyttyń damytý jónindegi dırektory Ǵaısa Jumalıevtiń málim etkenindeı, ónim Qazaqstandaǵy munaıgaz kompanııalarynyń suranysyn ótep qana qoımaı, oǵan qosa Batys Qazaqstan geografııalyq jaǵynan qolaıly ornalasqandyqtan, tasymaldaý shyǵynyn azaıtýǵa da múmkindik beredi. Taıaý ýaqytta kásiporynnyń óndiristik bazasynda munaıdy daıyndaý jáne hımııalyq reagentterdi saqtaıtyn tseh salynbaqshy. Kásiporyn iske qosylǵan kezde 50-den astam jańa jumys orny ashylmaq.
Kezdesý sońynda óndiristik nysandar qurylysynyń jospary, ınvestorlar men jetekshi mamandardy tartý jáne basqa da yntymaqtastyq máseleleri talqylandy.