Batys Qazaqstanda elektr jelilerin qaıta jańǵyrtý kózdelýde
Memleket basshysy Qasym-Jomart Toqaev Úkimettiń keńeıtilgen otyrysynda Batys Qazaqstan oblysynda elektr jelileriniń 80 paıyzǵa tozǵandyǵyn synǵa alyp, osyǵan oraı máseleni sheshý jóninde tapsyrma bergen bolatyn.
Ǵalı Esqalıevtiń sózine qaraǵanda, qazirgi kezde elektr jelilerin taratý kompanııasynyń aktsııalary men múlkin kommýnaldyq menshikke berý máselesi sotta qaralyp, sheshilýde.
«Bul másele sheshilse, bıýdjet esebinen jańǵyrtý jumystaryn júrgizýge múmkindik týar edi. Óıtkeni elektr jelileri men jabdyqtary ábden tozǵandyqtan, másele kúrdelenip tur. Kúshti jel tursa, elektr jelileri úzilip jatady. Kommýnaldyq menshikke berilgennen keıin oblystyq jáne respýblıkalyq bıýdjetten qansha qarjy kerektigin biletin bolamyz. Osy oraıda elektr jelilerin qalpyna keltirý jospary jasaldy», - dedi óńir basshysy.
«Batys Qazaqstan elektr jelilerin taratý kompanııasy» AQ dırektory Alhat Abzalılovtiń aıtýynsha, elektr jelileri 82 paıyzǵa tozǵan.
«Máseleni sheshý úshin 2021-2025 jyldarǵa arnalǵan «Batys Qazaqstan elektr jelilerin taratý kompanııasy» AQ-nyń elektr jelilerin jańǵyrtý jospary jasaldy. Aldyn ala esep boıynsha jobaǵa 22 350 mln teńge qajet, sonyń ishinde kompanııanyń óz qarjysy esebinen 2 450 mln, oblystyq bıýdjetten 712,6 mln, respýblıkalyq qazynadan 18 587,1 mln teńge kerek. Jeke ınvestıtsııalar («Batys Paýer» JShS) 600 mln teńgeni quramaq», dedi A.Abzalılov.
Jıyn barysynda sondaı-aq bıýdjettik jáne ınvestıtsııalyq baǵdarlamalar boıynsha úsh jańa joba tanystyryldy. Atap aıtqanda, 296 mln teńgege uzyndyǵy 36 km Jańaqala-Másteksaı 35 kV áýe jelisin salý kózdelýde. Sol sekildi Qaztalov-Jánibek-Saıqyn VL-110 kV jáne «Beles gaztýrbınaly stansasy 200 – «Aqjaıyq» qosalqy stansasy» (uzyndyǵy 17 km, 613 mln teńge) áýe jelilerin júrgizý josparlanyp otyr. Bul óz qýat kózderimizdi paıdalaný arqyly ony arzandatýǵa jáne Reseıden jetkiziletin elektr jaryǵynan bas tartýǵa múmkindik beredi.
Jıynda oblys pen aýdandardaǵy elektr jelilerin jańǵyrtýǵa baılanysty basqa da usynystar aıtyldy.
Ǵ.Esqalıev jobalardy oń baǵalap, birqatar tapsyrma berdi. Bul rette kelisimshart jasasqan kezde jergilikti taýar óndirýshilerge basymdyq berý jáne olarǵa deldaldarsyz, tikeleı shyǵý kerektigin atap kórsetti.