Batys Qazaqstanda dala órti úsh kúnnen keıin sóndirildi

ORAL. QazAqparat – Batys Qazaqstan oblysynda dala órti úsh kúnnen keıin sóndirildi, dep habarlaıdy QazAqparat tilshisi.

BQO TJ departamentiniń baspasóz qyzmeti málim etkenindeı, 22 tamyz kúni Aqjaıyq aýdany Býdarın aýylynan 3 shaqyrym jerde órt shyqqan edi.

Onyń aýmaǵy shamamen 265 gektardy qamtysa, sonyń 249 gektarynda qurǵaq shóp, 16 gektarynda orman alqaby otqa orandy. Keshe órt sóndirýshilerge kómekke «Qazavıaqutqarýdyń» MI-8 tikushaǵy Atyraýdan kelip jetti. Órt áli tolyqtaı joıylǵan joq, jeke quramnan 61 adam 11 tehnıkamen sol jerde qalyp, baqylaýda.

24 tamyz kúni saǵat 12.42-de Báıterek aýdany Şapov aýyldyq okrýgine qarasty Úlken Shaǵan aýyly mańynda 100 gektar dala órti tirkeldi, sonyń teń jartysy orman alqabyna jatady.

«Tilsiz jaý» TJ departamenti (21 qyzmetker, 6 tehnıka), «Órt sóndirýshi» (7 qyzmetker, 2 tehnıka), erikti órt sóndirý jasaǵy (16 adam, 4 tehnıka) kúshimen búgin saǵat 03.20-da aýyzdyqtaldy.

Munda MI-8 ushaǵy áýeden bes ret sý shashty.

Órt sóndirilgenimen, kún jel bolǵandyqtan, jeke quram men tikushaq sol jerden áli ketken joq.

Batys Qazaqstanda kún óte ystyq bolǵandyqtan, tótenshe órt qaýpi seıilmeı tur.

Eske sala keteıik, budan buryn Batys Qazaqstanda 250 tonna pishen órtenip ketkenin jazǵan bolatynbyz.