Batys Qazaqstanda bıyl úsh mekteptiń qurylysy aıaqtalmaq

ORAL. QazAqparat – Batys Qazaqstan oblysynda bıyl úsh mekteptiń qurylysyn aıaqtaý kózdelip otyr, dep habarlaıdy QazAqparat tilshisi.

BQO qurylys basqarmasynyń basshysy Álibek Antazıevtiń óńirlik kommýnıkatsııalar qyzmeti alańynda ótken brıfngte málim etkenindeı, bulardyń úsheýi de – 2022 jyldan aýysqan nysandar.

Atap aıtqanda, Kaztalov aýdany Kaztalov aýylynda 600 oryndyq mektep qurylysyn «Jıenbaı» JShS júrgizýde. Kelisimshart quny – 2 mlrd 754,3 mln teńge. Atalǵan nysandy salý barysynda qurylys materıaldarynyń kúrt ınflıatsııalyq qymbattaýyna baılanysty smetalyq qujattamaǵa túzetýler engizildi. Qazirgi tańda qurylys 90 paıyzǵa aıaqtalǵan.

Sondaı-aq Kaztalov aýdany Juldyz aýylynda 108 oryndyq mektep ǵımaratyn «Altaır» JShS salýda. Kelisimshart quny – 697,2 mln teńge. Kúni búginge deıin jumystar 40 paıyzǵa oryndalǵan.

Oǵan qosa 2022 jyly tótenshe jaǵdaılar jelisi boıynsha Qaratóbe aýdany Shalǵyn eldi mekeninde 60 oryndyq shaǵyn jınaqty mektep qurylysy bastalǵan edi. Quny 766,8 mln teńge turatyn qurylysty «Jıenbaı» JShS júrgizgen bolatyn. Alaıda merdigermen kelisimshart buzyldy. Bul nysannyń daıyndyǵy – 27 paıyz ǵana.

Álibek Saıynulynyń sózine qaraǵanda, bıyl Shalǵyn mektebi qurylysyna jergilikti bıýdjet esebinen 398,7 mln teńge bólinip, jańa konkýrstyq rásimder júrgizilýde. Konkýrs qorytyndysy 16 maýsymda shyǵarylyp, merdiger anyqtalǵannan keıin qurylys-montaj jumystary osy aıda bastalatyn bolady.

Úsh ǵımaratty da bıylǵy úshinshi toqsanda paıdalanýǵa berý josparlanýda.

Oblysta «QPO b.v.» kompanııasy qarajaty esebinen jeti aýdanda 15 shaǵyn jınaqty mektep salynýda.

Elimizde Memleket basshysynyń tapsyrmasyna sáıkes «Jaıly mektep» pılottyq ulttyq jobasy qolǵa alynǵany belgili.

Basqarma basshysynyń aıtýynsha, Batys Qazaqstan oblysynda 18 mekteptiń qurylysy (2023-2024 jyldary – 9, 2024-2025 jyldary – 9 mektep) ulttyq jobaǵa engizildi. Kúni búgin «Samruk-Kazyna Construction» AQ men BQO ákimdigi arasynda kontsortsıýmdyq kelisimsharttarǵa qol qoıylyp, 5 mektep boıynsha merdiger mekemeler anyqtalyp, nysanǵa qurylys tehnıkalaryn jáne jumys kúshin jumyldyrý jumystary júrgizilýde.

Qalǵan 4 mektep boıynsha konkýrstyq rásimder qaıta júrgizilýde. Qurylys jumystaryn bıylǵy jyldyń 3-4 toqsanynda bastaý oılastyrylýda.

«Naqty aıta ketsek, Oral qalasynda №53 mektep, №60 mektep jáne Medkolledj aýdanynda №65 mektep boı kóteredi. Bórli aýdany boıynsha Aqsaı qalasynda M.Yqsanov kóshesinde №1 mektep, 13-shaǵynaýdanda taǵy bir nysan, sondaı-aq Pýgachev aýylynda mektep salynady. Terekti aýdanynda Oral qalasyna tıip turǵan Podstepnyı aýylynda jańa mektep turǵyzylmaq. Sondaı-aq aldaǵy ýaqytta Báıterek aýdanynda Dostyq jáne Trekın aýyldarynda jańa bilim nysany iske qosylmaq. Jaıly mektepterdi syrtqy ınjenerlik jelilermen qamtý maqsatynda jobalyq-smetalyq qujattama daıyndaýǵa oblystyq bıýdjetten 298 mln teńge qarastyryldy. Qazirgi kezde bul jobalar boıynsha konkýrstyq jumystar júrgizilýde. Sonyń úsheýi boıynsha merdigerler anyqtaldy», dedi Á.Antazıev.