Batys Qazaqstanda bir kompanııanyń 47 qyzmetkerinen koronavırýs tabyldy

ORAL. QazAqparat – Batys Qazaqstan oblysynda bir kompanııanyń 47 qyzmetkerinen koronavırýs tabyldy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda málim etkenindeı, Bórli aýdanynda Bonattı S.P.A. kompanııasy qazaqstandyq fılıaly qyzmetkerleri arasynda vahtalyq aýysymnan shyǵý aldyndaǵy skrınıng kezinde 47 adamnan sımptomsyz indet anyqtaldy.

Bórli aýdanynda bıylǵy jyl basynan beri aýyrǵandar sany 100-ge jetken.

Osyǵan oraı Bórli aýdany bas memlekettik sanıtar dárigeriniń 13 qańtardaǵy qaýlysymen shekteý sharalary kúsheıtildi. Atap aıtqanda, qoǵamdyq tamaqtandyrý jáne basqa kópshilik oryndarda sanıtarlyq-dezınfektsııalyq rejimniń saqtalýyn baqylaý kúsheıtilip, memlekettik organdar qyzmetkerleriniń 80 paıyzy qashyqtan jumys isteýge kóshirildi.

Sol sekildi Jánibek aýdany Borsy aýyldyq okrýginde 8 adam indet juqtyrǵan. Sondyqtan koronavırýs juqpasyn odan ári taratpaý maqsatynda Borsy aýylynda karantındik shekteý sharalary kúsheıtilip, blokpost qoıyldy.

Sondaı-aq Oral qalasynda 1 balabaqsha tárbıelenýshisiniń koronavırýs juqtyrǵany tirkeldi. Oral qalasy bas memlekettik sanıtar dárigeri mindetin atqarýshynyń qaýlysymen karantın belgilenip, balabaqsha tobynyń qyzmeti toqtatyldy. Baılanysta bolǵan 18 adam (15 tárbıelenýshi men 3 balabaqsha qyzmetkeri) medıtsınalyq baqylaýǵa alyndy.

Nurlybek Ermekulynyń sózine qaraǵanda, jyl basynan beri óńirde 572 adamnyń syrqattanǵany anyqtaldy. 1 qańtardan bastap oblys boıynsha barlyǵy 24645 PTR zertteý júrgizildi, ortasha eseppen táýligine 3400-ge deıin zertteý júrgiziledi. Zerthanalardyń qýattylyǵy táýligine 6000 zertteýge deıin jetedi.

«Qańtar aıynda memlekettik shekaradan barlyǵy 6882 adam ótti. 2079 jolaýshynyń 227-sinde anyqtama bolǵan joq. 214 adam karantındik statsıonarǵa jatqyzylyp, ekeýinen indet tabyldy. Halyqaralyq júk tasymalymen aınalysatyn 3015 júrgizýshiniń anyqtamasy joq 995-inen alynǵan synama koronavırýs joqtyǵyn kórsetti», dedi N.Mustaev.

Eske sala keteıik, budan buryn BQO-nyń Báıterek aýdanynda karantındik sharalar kúsheıtilgenin jazǵan bolatynbyz.