Batys Qazaqstanda áıelin óltirmek bolǵan turǵyn ustaldy
QazAqparat budan buryn jazǵanyndaı, Báıterek aýdany Peremetnyı aýylynda 33 jasar turǵyn óziniń áıelin pyshaqtap, oqıǵa ornynan boı tasalaǵan edi.
BQO polıtsııa departamentiniń baspasóz qyzmetinen málim etkenindeı, kúdikti qanshama izin jasyrýǵa tyrysqanymen, keshe túngi saǵat 22.30-da qolǵa tústi.
«Oqıǵa oryn alǵan boıda dabyl boıynsha Báıterek aýdany polıtsııa bóliminiń barlyq jeke quramy tik kóterilip, kúdiktini izdeýge jumyldyryldy. Sonyń nátıjesinde ol bir táýlikke jetpeıtin ýaqyt ishinde ustaldy. Qazirgi kezde ol qylmysyn moıyndap, ýaqytsha ustaý ızolıatoryna qamaldy. Birqatar saraptama taǵaıyndalyp, QR QK 24-baby 3-bóligi – 99-baby 1-bóligine (kisi óltirýge oqtalý) sáıkes tergeý amaldary jalǵasýda. Atalǵan bap boıynsha aıypty dep tanylǵan adamǵa 8-den 15 jylǵa deıin bas bostandyǵynan aıyrý jazasy qarastyrylǵan», dep habarlady vedomstvodan.