Batys Qazaqstanda aýyl sharýashylyǵy ónimderiniń kólemi artty
«Ósimdik sharýashylyǵynda aýa raıy táýeldiginen arylý úshin egis alqaptary qurylymyn ártaraptandyrý jalǵasýda. Sharýa qojalyqtary kúzdik jáne maıly daqyl alańdaryn ulǵaıtyp, jańa tehnologııalardy qoldanady. Mysaly, ótken jyly 5 myń gektardan astam jerdiń 2,5 myń gektary zamanaýı jańbyrlatqysh agregattary arqyly sýaryldy. Al 2021-2024 jyldary 28 sharýashylyq zamanaýı jańbyrlatqysh agregattary arqyly sýarylatyn qosymsha 19 myń gektar jerdi qosýdy josparlap otyr», - dedi óńir ákimi Ǵ. Esqalıev Ortalyq kommýnıkatsııalar qyzmetinde ótken baspasóz máslıhatynda.
Qoıma jáne kólik ınfraqurylymyn damytý boıynsha Prezıdent tapsyrmasymen kókónis saqtaý qoımalary 57-ge deıin kóbeıtildi. Qosymsha jalpy qýaty 20 myń tonnadan asatyn 8 kókónis qoımasy salynady. Oǵan qosa bıyl kólemi 16 gektarǵa jetetin 2 jylyjaı paıdalanýǵa berilmek.
«Mal sharýashylyǵynda bıylǵy 4 aı qorytyndysy boıynsha iri qara mal basy ótken jylǵy kezeńmen salystyrǵanda 9,3%-ǵa, jylqy – 14,8%-ǵa, qoı men eshki – 2,8%-ǵa ósti. Óńirimiz et baǵytyndaǵy iri qara mal basynan respýblıkada ekinshi orynda tur. Jyl basynan beri 470 tonnaǵa jýyq iri qara jáne qoı eti men et ónimderi Reseı, Iran, Ázirbaıjan jáne basqa elderge eksporttaldy», - deıdi Ǵ. Esqalıev.
Ótken jyly Oral qalasynda «Oral qus fabrıkasy» JShS jylyna 18 mln dana jumyrtqa óndiretin jańa tsehty, al «Kýbleı» JShS – bir aýysymda 600 dana mal terisin óńdeıtin tsehty iske qosty. Bórili aýdanynda «Amanat» sharýa qojalyǵy jylyna 7,7 myń tonna sút óndiretin taýarly-sút fermasyn paıdalanýǵa berdi.
«Memleket basshysynyń tapsyrmasy aıasynda aýyl sharýashylyǵy kooperatıvterin qurý jumystary júrýde. Oblysta 242 aýyl sharýashylyǵy kooperatıvinde 4 myńnan astam jeke qosalqy sharýashylyq birikti. Ótken jyly aýyl sharýashylyǵy kooperatıvteri 843,6 tonna et, 6302 tonna sút jáne 21 tonna jún óndirdi», - dedi BQO ákimi Ǵalı Esqalıev.