Batys Qazaqstanda aýdan ortalyǵy Fedorovkanyń ataýy Terekti bolyp ózgerdi

ORAL. QazAqparat – Batys Qazaqstan oblystyq máslıhatynyń 11-sessııasynda depýtattar óńirdegi birqatar aýyldar men Oral qalasyndaǵy kóshelerdiń ataýyn ózgertý týraly usynysty maquldady, dep habarlaıdy QazAqparat tilshisi.

BQO tilderdi damytý basqarmasy málim etkendeı, Qazaqstan Respýblıkasy Prezıdenti Q.Toqaevtyń 2019 jylǵy 27 qyrkúıektegi № 19-32-20.357 tapsyrmasyna sáıkes onomastıkalyq ataýlardy retke keltirý jáne ıdeologııalyq turǵydan eskirgen ataýlardy ulttyq tanymǵa jaqyn ataýlarmen aýystyrý mindeti qoıylǵan bolatyn.

Osyǵan oraı BQO onomastıka komıssııasynyń 2021 jylǵy 28 sáýirdegi qorytyndysy negizinde, halyqtyń pikiri eskerile otyryp, Báıterek aýdany boıynsha Krasnov aýyldyq okrýgi – Beıbitshilik aýyldyq okrýgi, Krasnov aýyldyq okrýginiń Pogodaev aýyly – Beıbitshilik, Kotelnıkov – Syrym batyr aýyly, Jeleznov aýyldyq okrýgi – Atameken aýyldyq okrýgi, Jeleznov aýyldyq okrýginiń Jeleznov aýyly – Atameken aýyly, Novenkıı – Qaınar aýyly, Chebotarev aýyldyq okrýgi – Qurmanǵazy aýyldyq okrýgi, Chebotarev aýyly – Qurmanǵazy aýyly, Hamın – Amanat aýyly, Shalǵaı aýyldyq okrýginiń Karpovo aýyly – Tyńdala aýyly, Terekti aýdany boıynsha Fedorovka aýyldyq okrýgi – Terekti aýyldyq okrýgi, Fedorovka aýyldyq okrýginiń Fedorovka aýyly Terekti aýyly dep qaıta ataldy.

Osylardyń ishinde Fedorovka – Terekti aýdanynyń ortalyǵy.

Sondaı-aq Qazaqstan Respýblıkasy Úkimetiniń janyndaǵy Respýblıkalyq onomastıka komıssııasynyń 2021 jylǵy 23 sáýirdegi qorytyndysy negizinde Oral qalasynda M.Mámetova alańy – Batyr qyzdar alańy, Moskovskaıa kóshesi – Táýelsizdik, Mırzoıan kóshesi – Jeltoqsan, Soglasıe kóshesi – Shápet Qospanov, Táýelsizdik kóshesi – Bısen Jumaǵalıev, Svetlaıa kóshesi – Bazarbaı Jumanııazov, Nadejda kóshesi – Tuıaqberdi Shámelov, Lıstvennaıa kóshesi – Janǵalı Nabıýllın, Býketnaıa kóshesi – Nıkolaı Chesnokov, Volnaıa kóshesi – akademık Sýhan Kamalov, Orehovaıa kóshesi – Aldııar Rahmetov, Evrazııskaıa kóshesi Eýrazııa bolyp ózgertildi.

Birqatar kóshelerge óńirge eńbegi sińgen memleket jáne qoǵam qaıratkerleriniń, sondaı-aq aqyn, ǵalym, qurylysshy, kompozıtorlardyń esimderi berildi.

«BQO ákimdigi men oblystyq máslıhattyń birlesken qaýlysy men sheshimi shyqty. Atalmysh qujat memlekettik tirkeý úshin QR Ádilet mınıstrligine jiberildi», dep habarlady BQO tilderdi damytý basqarmasynan.

Eske sala keteıik, budan buryn Oral áýejaıyna Mánshúk Mámetovanyń esimi berilgenin jazǵan bolatynbyz.