Batys Qazaqstanda Astana kúnderi ótýde
H.Bókeeva atyndaǵy oblystyq qazaq drama teatrynyń foıesinde «Aq tilekpen, Astana!» atty sýretshiler kórmesi ashyldy.
Onyń ashylý rásimine qatysqan BQO mádenıet, arhıvter jáne qujattama basqarmasynyń basshysy Qadyrbolat Musaǵalıev Astana kúnine oraı Oralda úsh kún boıy túrli mádenı sharalar ótetindigin jetkizdi.
Astana qalasy mádenıet jáne sport basqarmasy basshysynyń orynbasary Narıma Muhambetalınanyń aıtýynsha, kórmege qazaqstandyq jáne astanalyq sýretshilerdiń 50-den astam týyndylary qoıylǵan. Bulardyń bári elordadaǵy Táýelsizdik saraıynyń qorynan ákelindi. Kórme 17-19 mamyr kúnderi jumys jasaıdy.
Kórmeden bólek, Oralda Astana qalasy memlekettik akademııalyq fılarmonııasynyń shyǵarmashylyq ujymdary «Nur Otan» partııasy oblystyq fılıaly ǵımaratynyń zalynda «Astanadan aq tilek» kontsertin qoıady. Onda «Saryarqa» halyq mýzykasy, estradalyq bı, «Shalqyma» bı ansamblderi, sondaı-aq klassıkalyq jáne estradalyq vokal solısteri óner kórsetedi. Al Ǵ.Qurmanǵalıev atyndaǵy oblystyq fılarmonııa zalynda Ǵ.Jubanova atyndaǵy memlekettik ishekti aspaptar kvarteti Aq Jaıyq jurtshylyǵyna keremet kesh syılamaq.
19 mamyrda ótetin «Elordadan elge sálem» gala-kontsertine astanalyq fılarmonııa ujymdarymen qatar Rınat Maltsagov, Klara Tólenbaeva syndy estrada juldyzdary, «Art-Dombyra» trıosy qatysady. Sondaı-aq Kórkem Sholoshova óziniń «Qyz qııaly» atty jeke bı baǵdarlamasyn usynady.
A.Ostrovskıı atyndaǵy BQO orys drama teatrynda M.Gorkıı atyndaǵy memlekettik akademııalyq orys drama teatry úsh kún boıy óz qoıylymdaryn kórsetedi.
«Aq Jaıyqqa barlyǵy 150-deı adam keldi. Osynyń aldynda Astananyń 20 jyldyǵyna oraı elordalyqtar Aqtóbe oblysynda bolǵan edi. Astanalyqtardyń óńirlerge sapary mamyr-qyrkúıek aılarynda osylaısha jalǵasa beredi», dedi QazAqparat tilshisine N.Muhambetalına.