Batys Qazaqstanda alty myńǵa jýyq asyl tuqymdy mal satyp alý kózdelýde

ORAL. QazAqparat - Batys Qazaqstan oblysynda bıyl tuqymdyq túrlendirýge 142,8 myń bas analyq mal basyn qatystyrý josparlanýda. Bul týraly búgin Ortalyq kommýnıkatsııalar qyzmeti óńirlik fılıalynda oblys ákiminiń birinshi orynbasary Arman Óteǵulov málim etti, dep habarlaıdy «QazAqparat» HAA tilshisi.

Onyń aıtýynsha, sol malǵa kúni búgin 2,4 myń bas asyl tuqymdy buqa qajet (2016 jyly tuqymdyq túrlendirýge 129 myń bas mal qatystyrylǵan edi). Sonymen qatar 2017 jyly 5 349 asyl tuqymdy mal (2016 jyly - 4 548 bas) satyp alý kózdelýde.

«Aýyl sharýashylyǵy kooperatıvteri týraly» QR Zańyna sáıkes oblysta 130 aýyl sharýashylyǵy (sonyń 129-y mal, bireýi ósimdik sharýashylyǵy baǵytynda) qurylyp, jumys jasaýda. Ótken jyly kooperatıvterge barlyǵy 398,2 mln teńge sýbsıdııa tólendi. Óńirge 2016 jyldan 2017 jyldyń 1 sáýirine deıin 9 aýyl sharýashylyǵy kooperatıvi, 261 mal bordaqylaý alańy, 2 sút qabyldaý, 7 mal soıý pýnkti, 9 refrıjerator alý jáne 7 mal soıý pýnktin jabdyqtaý jospary berilgen bolatyn. Kúni búgin oblys boıynsha mal bordaqylaýmen aınalysatyn 23 aýyl sharýashylyǵy kooperatıvi qurylsa, «Aýyl sharýashylyǵyn qarjylaı qoldaý qory» AQ-nyń BQO fılıaly arqyly 3 494 bas iri qara satyp alýǵa 247 otbasy 634,9 mln teńge nesıe aldy.

Sonymen qatar Aqjaıyq aýdanynda 400 mln teńgege aýysymyna 50 bas mal soıatyn pýnkt («Batys Nyq» JShS) iske qosylyp, jumys jasaýda. Munda 15 jumys orny ashyldy. Tasqala aýdanynda «Tasqala sút» JK aýysymyna 1 tonna sút óńdeıtin tsehty aqpan aıynda ashyp, on adamdy jumysqa aldy. Al Zelenov aýdany Darııan aýylynda «Kaverına» JK-nyń kúnine 40 tonna sútti óńdeıtin kásiporny osy naýryz aıynda paıdalanýǵa berilmekshi (40 jańa jumys orny).

Ótken jyly qabyldanǵan «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda 2017 jyldyń 1 sáýirinen 30 jeltoqsanǵa deıin 12 aýyl sharýashylyǵy kooperatıvi, 505 mal bordaqylaý alańy, 1 sút qabyldaý, 8 mal soıý pýnkti, 10 refrıjerator alý jáne 10 mal soıý pýnktin jabdyqtaý qolǵa alynbaq. Bul jospardy oryndaý úshin oblysqa 1474,0 mln teńge bıýdjettik nesıe qarastyrylǵan (300 jumys orny).

«Elbasynyń tikeleı tapsyrmasyna sáıkes 2013 jyldyń 18 aqpanynda «Agrobıznes-2020» agroónerkásip keshenin damytý boıynsha memlekettik salalyq baǵdarlama daıyndalyp, Qazaqstan Respýblıkasy Úkimetiniń №151 qaýlysymen bekitilgen bolatyn. Baǵdarlamaǵa sáıkes aýyl sharýashylyǵyn damytý maqsatynda Úkimet tarapynan jylma-jyl aıtarlyqtaı qarjy bólinýde. 2013-2016 jyldary oblystyń agroónerkásip keshenin damytýǵa memleket tarapynan 29 mlrd 371 mln teńge bólinse, tek 2016 jyly 9,3 mlrd teńge berilip, 2013 jylǵy qarajatpen salystyrǵanda, eki esege kóbeıdi. 2016 jylǵy qarashada Elbasynyń tapsyrmasyna sáıkes memlekettik salalyq baǵdarlama qaıta qaralyp, Qazaqstan Respýblıkasy Prezıdentiniń 2017 jylǵy 14 aqpandaǵy №420 Jarlyǵymen Qazaqstan Respýblıkasynyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasy bolyp bekitildi. Bul Elbasynyń aýyl sharýashylyǵy salasynyń damýyna degen úlken qoldaýy dep bilemiz. Atalǵan baǵdarlama aıasynda sýbsıdııalardy bólý qaǵıdalary qaıta qarastyrylyp, birtindep ónimdi saqtandyrýǵa kóshý jóninde Aýyl sharýashylyǵy mınıstrligi tarapynan naqty usynystar daıyndalýda. Daıyndalǵan usynystar mal sharýashylyǵy, ósimdik sharýashylyǵy jáne qaıta óńdeý salasyn qamtıtyn bolady», dedi «QazAqparat» tilshisine A.Óteǵulov.