Batys Qazaqstanda alıment tólemegen 80 boryshker izdestirilýde
BQO ádilet departamenti basshysynyń orynbasary Estaı Rashqalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 6 414 óndiris boıynsha alıment boryshkerlerdiń jalaqysynan ustalady.
Ádilet departamenti alıment óndirý týraly sot sheshimderin ýaqtyly jáne sapaly oryndaý baǵytynda tıisti jumystar atqaryp keledi. Alaıda ekonomıkalyq jaǵdaıdyń qıyndaýy, boryshkerlerdiń turaqty eńbekaqysy, mekenjaıy bolmaýy, densaýlyǵy men kásibı daǵdylarynyń jaı-kúıi sot oryndaýshylaryna sot sheshimderin tolyq kólemde oryndaýǵa múmkindik bermeıdi. Sonyń saldarynan kóptegen balalar memleket pen qoǵam tarapynan materıaldyq jáne moraldyq qoldaýǵa muqtaj.
Estaı Eltaıulynyń sózine qaraǵanda, 380 boryshker alımentti múldem tólemeıdi nemese turaqsyzdyq kórsetedi. Olardyń bereshegi 842,3 mln teńgege jetti. 80 boryshker izdestirilýde.
Departament basshysy orynbasarynyń aıtýynsha, jyl basynan beri sot aktilerin oryndaýdan jaltarǵany úshin 167 boryshker ákimshilik jaýapkershilikke tartylsa, sonyń 97-si ákimshilik qamaqqa alyndy. 56-syna ákimshilik aıyppul salyndy. 12 is qysqartyldy.
QR QK 139-babyna sáıkes 11 boryshkerge qatysty qylmystyq is qozǵaldy.
«Alıment óndirip alý jónindegi sheshimderdiń negizinde jazylǵan atqarýshylyq qujattar tólem jasaýǵa berilgen barlyq ýaqytta kúshin joımaıdy. Búgin alıment tóleýden jaltarǵanmen, bereshek somanyń ósimi esepteledi jáne bala kámeletke tolǵannan keıin de óndirýge jatady. Sondyqtan boryshkerler alımenttik mindettemeni oryndaýdan jaltarmaýy kerek», dedi E.Rashqalıev.