Batys Qazaqstanda Alash arystaryna arnalǵan konferentsııa ótti
Jympıty aýyly Kúnbatys Alashordasynyń astanasy bolǵany málim. Munda Alash qaıratkerleriniń izi saırap jatyr deýge bolady. Osyǵan oraı konferentsııaǵa qatysýshylar Alash qaıratkerlerine arnalǵan eskertkishke gúl shoqtaryn qoıyp, mýzeıde boldy. J.Dosmuhamedov atyndaǵy Óleńti orta mektebinde Jahanshaǵa arnalǵan mýzeı ashyldy. Onda kórnekti qaıratkerge qatysty qundy jádigerler qoıylǵan.
Respýblıkalyq konferentsııany ashqan oblys ákiminiń orynbasary Baǵdat Azbaev Alash qozǵalysynyń elimizdiń erkindik alýy jolynda mańyzdy ról atqarǵanyn jetkizdi. Elbasynyń «Rýhanı jańǵyrý» baǵdarlamasy aıasynda atalmysh jıynnyń azattyq týyn kótergen Jympıty jerinde ótýi zańdy. Alash qaıratkerleriniń arman-maqsaty Qazaqstannyń táýelsizdik alýy arqasynda oryndalyp otyr.
Aýdan ákimi Tólegen Tóreǵalıev Alashorda úkimetiniń 100 jyldyǵyna ázirlik aıasynda atqarylǵan jumystar jóninde áńgimelep berdi.
Konferentsııada alashtanýshy-ǵalym, fılologııa ǵylymdarynyń doktory, «Otyrar kitaphanasy» ǵylymı-zertteý ortalyǵynyń dırektory Tursyn Jurtbaı Alash partııasy baǵdarlamasynyń negizin quraǵan bes qaǵıdaǵa toqtaldy. Bul - ulttyq-demokratııalyq memleket qurý, halyqtyń basty baılyǵy retinde jerdi saqtaý, qazaq qoǵamyndaǵy birlikti nyǵaıtý, tildi, mádenıetti jáne dindi damytý, bilim men ǵylymǵa basymdyq berý. Sondaı-aq ekonomıka men sanany jańǵyrtý, quqyqtyq negizdi qalyptastyrý, azamattardyń muń-muqtajy men suranystaryn qanaǵattandyrý, teńdik, kelisim men beıbitshilik, qoǵamdyq-saıası isterge qalyń buqaranyń aralasýyn qamtamasyz etý syndy ıdeıalar búgingi tańda da mańyzyn joıǵan joq.
Batys Qazaqstan ınnovatsııalyq-tehnologııalyq ýnıversıtetiniń dotsenti, tarıh ǵylymdarynyń kandıdaty Dámetken Súleımenova Alashordaǵa qatysty tyń derekter jóninde sóz qozǵady. Buryn kópke belgisiz bolyp kelgen Alash qaıratkerleri anyqtalýda. Mysaly, sonyń biri Qaldybaı Asanov - joǵary bilimdi ekonomıst, Saratov ýnıversıtetiniń túlegi. Ol Alashtyń áskerı jasaqtarynyń qurylýyna tikeleı atsalysty. Qaldybaı Asanov otyzynshy jyldar zobalańyna iligip, 1937 jyldyń qarashasynda atyldy. Bıyl Syrym aýdanynyń delegatsııasy Máskeýdegi Býtov polıgonyna baryp, Jahansha Dosmuhamedov jerlengen jerge taǵzym etip qaıtty. Endi osy polıgonda 27 qyrkúıekte saıası qýǵyn-súrgin qurbandaryna arnalǵan eskertkish taqta ashylmaqshy.
Jıyn barysynda sondaı-aq Shákárim atyndaǵy Semeı ýnıversıtetiniń professory, arheolog Amantaı Isın, Abaı atyndaǵy Qazaq ulttyq pedagogıkalyq ýnıversıteti tarıh jáne quqyq ınstıtýtynyń dırektory Bolat Jumaǵulov, Memleket tarıhy ınstıtýtynyń jetekshi ǵylymı qyzmetkeri, tarıh ǵylymdarynyń kandıdaty Qundyzaı Erimbetova, Astrahan memlekettik ýnıversıteti Reseı tarıhy kafedrasynyń dotsenti Andreı Syzranov jáne basqalar Alashorda úkimetiniń san qyrly qyzmeti men Alash tarıhynyń qazirgi el damýymen baılanysy tóńireginde oı-pikirlerimen bólisti.
Konferentsııa materıaldary jeke jınaq bolyp jaryq kórdi.
Aıta keteıik, kóp uzamaı el bastaǵan kósem, sóz bastaǵan sheshen, batyr Syrym Datulynyń 275 jyldyǵyna arnalǵan sharalar da ótedi.