Batys Qazaqstanda «Aqjaıyqtaǵy Alash izderi» atty konferentsııa ótti
Alash úkimetiniń tarıhy týraly beınebaıanmen bastalǵan konferentsııany ashqan aýdan ákimi Ádil Jolamanov Elbasynyń «Rýhanı jańǵyrý» baǵdarlamasy aıasynda qolǵa alynǵan mundaı sharanyń mańyzdylyǵyna toqtalyp, Alash arystarynyń arman-oılary men artynda qaldyrǵan jarqyn isteri búgingi kúnniń maqsat-mindetterimen úndesetinin, olardyń el tarıhyndaǵy orny erekshe ekendigin jetkizdi.
Konferentsııa barysynda Alash úkimeti belesindegi Aqjaıyq aýdanynyń tarıhy, Alash qozǵalysynyń el egemendigi jolyndaǵy mańyzy men roli, onyń shejiresi, Batys Alashorda qaıratkerleriniń eńbegi, tarıhtaǵy izderi, olardyń ustanymdary men shyǵarmashylyǵyn jas urpaq arasynda nasıhattaý baǵytynda belgili ǵalymdar men jergilikti ólketanýshylar baıandama jasady. Atap aıtqanda, Almatydan arnaıy kelgen alashtanýshy, fılologııa ǵylymdarynyń kandıdaty Maqsat Táj-Murat «Azamattar bar edi, kúrek tisimiz syqyldy» degen baıandamasynda tyń derekterimen bólisti. Sol sekildi M.Ótemisov atyndaǵy Batys Qazaqstan memlekettik ýnıversıteti «Qazaqstan tarıhy jáne ólketaný» ǵylymı ortalyǵynyń jetekshisi, tarıh ǵylymdarynyń kandıdaty Jańabek Jaqsyǵalıev «Alash arystarynyń armany: tarıh jáne taǵylym», H.Dosmuhamedov atyndaǵy Atyraý memlekettik ýnıversıteti «Máńgilik el» ǵylymı-zertteý ortalyǵynyń dırektory, tarıh ǵylymdarynyń doktory Aqqalı Ahmet «El aýmaǵyn túgendegen Tanashev» jáne basqa ǵalymdar túrli taqyryptarda baıandama jasady.
Konferentsııadan keıin ǵalymdar men eńbek ardagerleri, zııaly qaýym ókilderi dóńgelek ústel basynda pikirlesti. Onda Alash qaıratkerleriniń esimderin máńgi este qaldyrý baǵytynda usynystar aıtyldy.