Batys Qazaqstanda 91 sábıdiń ata-anasy ekpeden bas tartty
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaev málim etkendeı, bıylǵy úsh aıda perzenthanada dúnıege kelgen 2 954 náresteniń 2 731-i BTsJ vaktsınasymen qamtylǵan.
Onyń sózine qaraǵanda, 223 sábıge ekpe salynbaǵan. Bulardyń 131-inde (58,7 paıyzy) medıtsınalyq qarsy kórsetilim bolsa, 91 balanyń ata-anasy (40,8 paıyzy) vaktsına qabyldaýdan bas tartqan.
Departament basshysynyń aıtýynsha, juqpaly dertterdiń aldyn alý úshin Ulttyq egýler kúntizbesine sáıkes aı saıyn maqsatty top balalaryna profılaktıkalyq ekpeler jasalady.
Tek profılaktıkalyq ekpeler ǵana qyzylsha, qyzamyq, polıomıelıt, kúl, kókjótel, sirespe, vırýsty V gepatıti, týberkýlez, epıdemııalyq parotıt sııaqty aýrýlardan qorǵaıdy. Respýblıkada turǵyndardy ımmýndaý úshin Qazaqstan Respýblıkasynyń memlekettik tirkeýinen ótken vaktsınalar qoldanylady.
Ókinishke qaraı, profılaktıkalyq ekpeden de bas tartqan ata-analar (jyl basynan beri – 89) áli kezdesýde. Bulardyń basym bóligi – Oral qalasynyń turǵyndary. Sondaı-aq Aqjaıyq, Jańaqala, Báıterek, Syrym jáne Terekti aýdandarynda tirkelgen.
«Koronavırýsqa baılanysty jaǵdaı Qazaqstanda turaqtalǵanymen, Eýropanyń Ulybrıtanııa sııaqty elderinde, Qytaıda indet órship tur. Sondyqtan vaktsınatsııa máselesi kún tártibinen túspeıdi. Búginde oblysta 275 969 adam (66,6 paıyz) koronavırýsqa qarsy birinshi, 266 940-y (64,4 paıyz) ekinshi komponentpen egildi. Sáýir aıynyń sońyna deıin 180 957 adam revaktsınatsııadan ótýi tıis bolsa, sonyń 78 135-i (43,2 paıyzy) ekpe saldyrdy. Oblysta koronavırýsqa qarsy Pfizer, QazVac, Sınofarm vaktsınalary bar», - dedi M.Aryspaev.