Batys Qazaqstanda 90 myńnan astam zeınetker turady
BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Dildásh Isqaqovanyń óńirlik kommýnıkatsııalar qyzmeti alańynda ótken brıfıngte málim etkenindeı, oblys boıynsha barlyǵy 90 myńnan astam zeınetker bar.
Sonyń ishinde 1 322-si – soǵys ardagerlerine teńestirilgender, 260 – maıdanger jesirleri, 3 287-si – tyl eńbekkerleri.
Sondaı-aq oblysta 10 136 kóp balaly ana, 24 myńnan astam múgedek (munyń 2 866-sy – múgedektigi bar balalar) turady.
Ekinshi dúnıejúzilik soǵys ardagerleri men solarǵa teńestirilgen adamdarǵa «Ardagerler týraly» jáne «Qazaqstan Respýblıkasynda zeınetaqymen qamsyzdandyrý týraly» Zańdaryna sáıkes kómek kórsetiledi.
Onyń sózine qaraǵanda, maıdangerlerge respýblıkalyq bıýdjetten tólenetin arnaýly memlekettik járdemaqydan basqa, jergilikti ókiletti organdardyń sheshimderine sáıkes jergilikti bıýdjet esebinen ataýly jáne merekelik kúnderge tólenetin birjolǵy áleýmettik kómek jáne kommýnaldyq shyǵyndardy óteý úshin tólenetin aı saıynǵy áleýmettik kómekter qarastyrylǵan. Mysaly, soǵysqa qatysýshylar men múgedekterine jáne solarǵa teńestirilgen (Lenıngradta qorshaýda, kontslagerlerde tutqynda bolǵan) 3 761 adamǵa Jeńistiń 77 jyldyǵyna oraı 135 mln teńge áleýmettik járdem berildi. Sonymen qatar olarǵa kommýnaldyq qyzmetterdi tóleý úshin aı saıyńǵy áleýmettik kómek 5 AEK (15 900 teńge) mólsherinde kórsetilýde.
Sondaı-aq «Turǵyn úı qatynastary týraly» QR Zańyna sáıkes jalǵyzbasty zeınetkerlerge, az qamtylǵan otbasylaryna turǵyn úı kómegi kórsetiledi. Bıyl 1 qyrkúıekke deıin 1 024 otbasy turǵyn úı kómegimen (34,4 mln teńge) qamtyldy.
Basqarma basshysy orynbasarynyń aıtýynsha, jergilikti atqarýshy organdar az qamtylǵan otbasylarǵa (azamattarǵa) únemi áleýmettik qoldaý kórsetip keledi. Aıtalyq, 2 903 otbasyna (13 706 adam) 647,1 mln teńge kóleminde ataýly áleýmettik kómek berilse, sonyń 910-y – kóp balaly otbasylar.
Kóp balaly otbasylar, múgedekter, ómirlik jaǵdaıy qıyn azamattarǵa, jalǵyzbasty qarııalarǵa basqalaı da járdem berilýde.
«Dástúr boıynsha 1 qazan men 1 qarasha aralyǵynda óńirde «Meıirbandyq kúnderi» qaıyrymdylyq aılyǵy ótkizilmekshi. Ótken jyly qaıyrymdylyq aıynda 7 124 adamǵa 165 mln teńgeniń kómegi kórsetilgen bolatyn. Bıyl da oblys ákimdiginiń arnaıy qaýlysy qabyldanyp, is-sharalar jospary bekitildi. Aılyq aıasynda menshik nysanyna qaramastan, túrli kásiporyndar, kásipkerler jáne basqa janashyr jandar kómekke muqtaj adamdarǵa qolushyn beretini anyq», dedi D.Isqaqova.
Eske sala keteıik, budan buryn BQO-da jastardy jumyspen qamtý jospary oryndalyp otyrmaǵanyn jazǵan bolatynbyz.
Ashyq kózderden alynǵan foto