Batys Qazaqstanda 90 myńnan astam bala mektepke barmaqshy
BQO bilim basqarmasy basshysynyń orynbasary Záýre Ǵumarovanyń aıtýynsha, ótken oqý jylynda bul kórsetkishter sáıkesinshe 88 myńnan astam jáne 10 myńnan astam bolǵan edi. Ásirese, Oral qalasynda oqýshylar sany kóbeıýde, ótken jyly 35 myńnan astam (birinshi synypqa - 4,5 myńnan astam) bala barsa, bıyl 38 myńdaı jetkinshek (1-synypqa - 5 myńnan astam) mektep esigin ashpaq.
Ótken jyly bala sanynyń azaıýyna baılanysty 10 bastaýysh mektep jabylsa, bıyl sondaı segiz bilim ordasy jumysyn toqtatpaq. Qazirdiń ózinde Tasqala aýdanynda Taldybulaq, Lenın joly, Bórlide Nııazbek, Aqjaıyqta Qaraǵaı, Shektibaı, Shyńǵyrlaýda Konstantınovka, Qyzylkól bastaýysh mektepterin jabý jóninde aýdan ákimdikteriniń qaýlysy shyqty. Bókeı ordasy aýdanyndaǵy Mámbet bastaýysh mektebi jóninde de osyndaı qaýly qabyldanbaqshy. Bilim berý uıymdary jelisiniń kepildik berilgen memlekettik normatıvin bekitý týraly QR Úkimetiniń 2007 jylǵy 21 jeltoqsandaǵy «Bilim berý uıymdaryn kepildendirý normatıvi týraly» №1256 Qaýlysyna sáıkes árbir aýyldyq eldi mekende kishi mektep jasyndaǵy (1-4 synyp) bala sany beseý bolǵanda ǵana bastaýysh mektep saqtalady. Jańaǵy mektepterde úsh-tórtten ǵana qalyp otyr. Bul baldyrǵandar oqýsyz qalmaıdy, kórshiles aýyldardaǵy basqa mektepterge ornalastyrylady.
Bıyl Oral qalasyna qarasty Zachagan kentinde 1200 oryndyq jáne Jańaqala aýdany ortalyǵy Jańaqala aýylynda 100 oryndyq ınternatymen 600 oryndyq jańa eki mektep ashylmaq. Sonda oblys boıynsha 391 mektep (ótken jyly - 397) jumys jasaıtyn bolady. Elbasymyzdyń «Nurly jol - bolashaqqa barar jol» atty Joldaýynda atap kórsetilgenindeı, birinshi kezekte apatty mektepter men úsh aýysymda oqytý máselelerin sheshý mindeti qoıylǵany belgili. Óńirde úsh aýysymda oqytatyn bilim oshaqtary joq, al apatty mektepter máselesi taıaýda tolyqtaı sheshiledi.
Aıta keteıik, oblysta «Mektepke jol» sharasy 1 tamyz-30 qyrkúıek aralyǵynda bıyl segizinshi jyl qatarynan jalǵasyn tabady. Jeti jyl ishinde óńirde 97145 baldyrǵan 423,273 mln. teńgeniń materıaldyq kómegine qol jetkizdi. Ótken jyly kómekke muqtajdardy naqtylaý maqsatynda muǵalimderdiń qatysýymen 42836 aýla aralaý sharasy júrgizilip, 19099 oqýshyǵa 90,794 mln. teńgeniń, sonyń ishinde demeýshiler esebinen 48,496 mln. teńgeniń járdemi kórsetildi. Bul rette Bórli, Jańaqala, Zelenov, Syrym, Terekti aýdandarynda materıaldyq kómek kólemi ósti.
Bıyl shamamen 18 myńnan astam bala mektepke barý úshin qolushyn sozýdy qajet etedi.