Batys Qazaqstanda 800-ge jýyq adamnyń karantın talabyn buzǵany anyqtaldy
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń málim etkenindeı, sonyń 772-si – «qyzyl», 11-i – «sary» mártebesi
bar adamdar. Olar úılerinde oqshaýlanýy tıis bolsa da, «Ashyq» qosymshasymen jumys isteıtin nysandarǵa barǵan.
M.Aryspaevtyń aıtýynsha, osy anyqtalǵan buzýshylyqtar boıynsha QR Ákimshilik quqyqbuzýshylyq kodeksi 425-baby 1-bóligine sáıkes 81 hattama toltyrylyp, 3,7 mln astam
teńge kóleminde aıyppul salyndy.
Karantın talabyn buzǵan «qyzyl» mártebesi bar 72 adamnyń aty-jóni áleýmettik jelilerde jarııa etildi.
Departament basshysynyń sózine qaraǵanda, QR bas memlekettik sanıtar dárigeriniń 18 aqpandaǵy №10 jáne №11 qaýlylaryna sáıkes birqatar ózgerister men tolyqtyrýlar engizildi.
Atap aıtqanda, «jasyl» jáne «kók» mártebesi bar adamdarǵa «Ashyq» qosymshasymen jumys isteıtin nysandarǵa barýǵa ruqsat etildi. Sonymen qatar olar kórme, marafon, sporttyq, saltanatty, estelik, otbasylyq is-sharalar, konferentsııa, forýmdar jáne basqa kóp adam jınalatyn is-sharalardy uıymdastyryp, ótkize jáne bara alady.
Oǵan qosa oflaın rejımde uıymdar men keńselerdiń jumysy úshin shekteýler alynyp tastaldy.
Aýrý belgileri bolmaǵan jaǵdaıda baılanysta bolǵan adamdardy úı karantıninde oqshaýlaý joıyldy.
«Sol sekildi balalardyń «jasyl» nemese «kók» mártebesi bar ata-analary men zańdy ókilderine bilim berý uıymdarynyń ǵımarattaryna kirýge ruqsat etiledi», dedi
M.Aryspaev.
Eske sala keteıik, budan buryn Batys Qazaqstanda 64 myńǵa jýyq adamnyń revaktsınatsııadan ótkenin, sońǵy aptada koronavırýs juqtyrý 43,7 paıyzǵa azaıǵanyn jazǵan bolatynbyz.