Batys Qazaqstanda 80 mlrd teńgege 617 shaqyrym jol jóndeledi

ORAL. QazAqparat – Batys Qazaqstan oblysynda «Qýatty óńirler – el damýynyń draıveri» ulttyq jobasy, sondaı-aq «Aýyl – el besigi» baǵdarlamasy aıasynda bıyl 80,3 mlrd teńgege 617 shaqyrymnan astam joldy jóndeý kózdelip otyr, dep habarlaıdy QazAqparat tilshisi.

BQO jolaýshylar kóligi jáne avtomobıl joldary basqarmasynyń basshysy Aıdar Meńeevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde respýblıkalyq mańyzy bar 150,1 shaqyrym joldy jóndeýge 39,2 mlrd teńge, 335,8 shaqyrym jergilikti jolǵa 26,6 mlrd, 83,1 shaqyrym aýylishilik joldarǵa 7 mlrd, Oral qalasy kóshelerine (47,6 shaqyrym) 7,5 mlrd teńge jumsalmaq.

Aıdar Qazbekulynyń sózine qaraǵanda, oblystyq mańyzy bar joldar boıynsha 13 joba júzege asyrylyp jatyr. Sonyń úsheýi – qaıtv jańǵyrtý, bireýi – kúrdeli jóndeý (Derkól ózeni arqyly ótetin kópir) qalǵany – orta jóndeý jobalary.

«Bıyl qurylys jumystarynyń qymbattaýyna baılanysty qaıta jańǵyrtý jobalaryn túzetý qolǵa alyndy. Atap aıtqanda, Barbastaý-Aqjaıyq-Inder (43-93 km, joba quny – 6,8 mlrd teńge) joly boıynsha túzetý jumystary aıaqtalýǵa jaqyn. Sondaı-aq Bórli-Aqsaı-Jympıty (68-139 km, 18 mlrd teńge), Chapaev-Jańaqala-Saıhyn (130-191 km, 15,1 mlrd teńge) joly boıynsha túzetý jumystaryn aldaǵy eki apta ishinde bitirý kózdelip otyr. Kúni búgin barlyq qaıta jańǵyrtý nysandary boıynsha jóndeý jumystary tolyǵymen jandandy. Óńirde Oral qalasy men aýdandarda basqa da baǵyttar boıynsha joldar jóndeletin bolady», - dedi A.Meńeev.