Batys Qazaqstanda 68 myń adam tumaýǵa qarsy ekpe qabyldaıdy
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, bul oblys turǵyndarynyń 10 paıyzynan asady.
Onyń aıtýynsha, tumaýǵa qarsy egý jumystary 3 qazan kúni bastalady.
Osy maqsatta bıýdjetten bólingen 66,7 mln teńgege Reseıde óndirilgen «Grıppol +» vaktsınasynyń 68 myń dozasy satyp alyndy.
Tumaýǵa qarsy medıtsına qyzmetkerleri, alty aıdan asqan jıi aýyratyn balalar, jetim jáne ata-ana qamqorlyǵynsyz qalǵandarǵa arnalǵan bilim berý uıymdary men balalar úıleriniń tárbıelenýshileri, júkti áıelder, júrek-qan tamyrlary jáne tynys alý organdarynyń sozylmaly syrqatyna shaldyqqandar, sondaı-aq qarttar úıleriniń turǵyndary aqysyz negizde egiledi.
Nurlybek Ermekuly turǵyndarǵa ekpeden basqa aldyn alý sharalaryn da umytpaý kerektigin, eń bastysy, saqtaný qajettigin jetkizdi. Óıtkeni tumaý asqynsa, óte qaýipti. Atap aıtqanda, tumaý pnevmonııa, menıngıt, otıt, sınýsıt, gaımorıt, bronhıt, mıokardıt sııaqty aýrýlarǵa ulasyp ketýi múmkin. Bulardyń ishindegi eń qaýiptisi – kóbinese sońy ólimmen aıaqtalatyn pnevmonııa.
«2021-2022 jylǵy epıdemııalyq maýsymda 62 493 adamnyń jiti respıratorly-vırýsty juqpaǵa (JRVJ) shaldyqqany tirkeldi. Bul aldyńǵy maýsymmen (41 132) salystyrǵanda, 33,7 paıyzǵa kóp. Sonyń ishinde 57,56 paıyzy (35 972) – 14 jasqa deıingi balalar. 1,94 paıyzy (1 228) – júkti áıelder. 1 141 adam JVRJ-men, 80 naýqas tumaýmen aýrýhanaǵa jatqyzyldy. Ótken epıdemııalyq kezeńde barlyǵy 98 adamnyń tumaýmen aýyrǵany tirkeldi», dedi QazAqparat tilshisine N.Mustaev.
Eske sala keteıik, budan buryn Oralda jiti ishek ınfektsııalarymen aýyrǵandar sany 6 esege óskenin jazǵan bolatynbyz .