Batys Qazaqstanda 600-den astam jas ásker qataryna shaqyrylmaq
BQO qorǵanys isteri jónindegi departamenti bastyǵynyń orynbasary, podpolkovnık Albert Bekmuhanovtyń óńirlik kommýnıkatsııalar qyzmeti alańynda ótken brıfıngide málim etkenindeı, 1 naýryzdan bastap jergilikti atqarýshy organdardyń áskerge shaqyrý pýnktterinde ákimder orynbasarlarynyń tóraǵalyq etýimen qalalyq jáne aýdandyq áskerge shaqyrý komıssııalary jumysqa kiristi.
Onyń aıtýynsha, qoldanystaǵy zańǵa sáıkes áskerge shaqyrýdy keıinge qaldyrýǵa nemese odan bosatylýǵa negizderi joq 18-den 27 jasqa deıingi Qazaqstan azamattary merzimdi áskerı qyzmetke shaqyrylady.
Áskerge shaqyrylýshylar SMS-habarlamalar taratý, sondaı-aq úı jáne qyzmettik mekenjaılary boıynsha jeke shaqyrý qaǵazdaryn joldaý arqyly habardar etiledi.
Jastar eki ret, atap aıtqanda, áskerge shaqyrý kezinde (jıyn pýnktterinde) jáne áskerı bólimderge kelgen kezde PTR testisin tapsyrady.
«Memleket basshysy Qasym-Jomart Toqaev Parlament Májilisiniń otyrysynda mańyzdy máselege toqtalǵan bolatyn. Ol – kóptegen jastardyń áskerı boryshyn óteýden jaltarýy. Osy oraıda Qorǵanys mınıstrligi jastardy áskerı qyzmetin óteýge yntalandyrýǵa baǵyttalǵan usynystar ázirledi. Bular merzimdi áskerı qyzmet óteý kezinde nesıelik demalys berýge, belgili bir qyzmet merziminen keıin bir jolǵy aqshalaı syıaqy tóleýge, sondaı-aq bilim berý salasynda jáne otbasy múshelerinekommýnaldyq qyzmetterdi tóleýde jeńildikter berýge qatysty. Bul usynystar múddeli memlekettik organdarmen kelisilýde», dedi A. Bekmuhanov.
Brıfıngte Oral qalasy qorǵanys isteri jónindegi basqarmasynyń bastyǵy, podpolkovnık Rýslan Baltemirovtiń tolyqtyrǵanyndaı, oblys ortalyǵynan 250-den astam jasty áskerge attandyrý josparlanýda.
2021 jyldyń 1 qyrkúıegi men 30 jeltoqsany aralyǵynda Oral qalasynan 225 jasty áskerge jiberý kózdelse, attanǵany – 196, ıaǵnı jospar 87,1 paıyzǵa oryndaldy.
Naýryz-maýsym aılarynda zerdeleý jumystary kezinde kelmeı júrgen áskerge shaqyrylýshylardy izdestirý baǵytynda birlesken reıdtik is-sharalar júrgiziletin bolady.