Batys Qazaqstanda 5 myńǵa jýyq talapker UBT synaǵynan ótti
BQO bilim basqarmasynyń baspasóz qyzmeti málim etkenindeı, óńirde 22 maýsym – 1 shilde aralyǵynda 9 testileý pýnktinde UBT tapsyrý uıymdastyryldy.
Atap aıtqanda, Aqjaıyq, Bórli, Jańaqala, Jánibek, Qaztalov, Qaratóbe, Syrym aýdandary ortalyqtary men Oralda M.Ótemisov atyndaǵy Batys Qazaqstan memlekettik ýnıversıtetinde jáne Jáńgir han atyndaǵy Batys Qazaqstan agrarlyq-tehnıkalyq ýnıversıtetinde talapkerler testileýden ótti.
Barlyq testileý pýnktterinde sanıtarlyq-epıdemıologııalyq talaptar oryndaldy: tosqaýyl úshin qajetti jyljymaly lentalar, dezınfektsııalaý tonneli, sanıtaızerler, aıaqkıimge arnalǵan dezınfektsııalaý kilemsheleri, teplovızor, maska, qolǵappen qamtamasyz etildi.
Jergilikti polıtsııa bólimderimen birge qoǵamdyq tártipti saqtaý baǵytynda kezekshilik uıymdastyryldy. Testileý oryndarynda medıtsına qyzmetkerleri men jedel járdem de boldy.
Sanıtarlyq-epıdemıologııalyq talaptardy saqtaı otyryp, aýyldardan 1732 túlek UBT pýnktterine jetkizildi.
Óńirde barlyǵy 5066 úmitker UBT-ǵa qatysýǵa ótinish bildirse, sonyń 187-si test tapsyrýdan óz erikterimen bas tartty.
Tyıym salynǵan zattardy alyp ótpek bolǵan 25 túlek testileýge jiberilmedi. Sondaı quraldarmen ustalǵan 20 úmitker aýdıtorııadan shyǵarylyp, test nátıjeleri joıyldy.
Karantınde bolýyna baılanysty 3 túlek jáne qyzýy joǵary ekeni anyqtalǵan 1 testilenýshi UBT tapsyrmady.
Osylaısha oblysta barlyǵy 4828 talapker synaqtan ótti.
Bıylǵy UBT tapsyrýdaǵy jańalyqtyń biri – SAT, ACT, IB halyqaralyq standarttalǵan testteriniń balyn Ulttyq biryńǵaı testileý balyna aýystyrý shkalasy engizildi. Osyǵan oraı daryndy balalarǵa arnalǵan mamandandyrylǵan S. Seıfýllın atyndaǵy №11 oblystyq qazaq mektep-ınternat kesheniniń eki túlegi Ámirjan Armandıev pen Shynar Marsqa QR Bilim jáne ǵylym mınıstrliginiń sheshimimen 140 ball kórsetilgen sertıfıkat tabys etilip, olar UBT tapsyrýdan bosatyldy.
Eske sala keteıik, budan buryn Batys Qazaqstanda alty kúnde 3 myńǵa jýyq talapkerdiń UBT synaǵynan ótkenin jazǵan bolatynbyz.